Kryeministri Edi Rama u ndal ditën e sotme në Bullgari pas vizitës që pati në Hungari, ku takoi edhe kryeministrin Viktor Orban. Rama u takua në Sofje me homologun Stefan Janev, ndërsa gjatë konferencës për shtyp foli edhe për konfliktin mes Bullgarisë dhe Maqedonisë së Veriut.
Rama tha se Bullgaria duhet të kujtojë veten kur ishte në të njëjtat pozita, ndërsa shtoi se Shqipëria është “mbërthyer” mes dy miqve. Ai shprehu gatishmërinë për të ndihmuar, por në fund iu takon bullgarëve dhe Maqedonisë së Veriut që ta zgjidhin çështjen.
“E di që në Bullgari ka një qeveri kujdestare. Keni zgjedhje të reja. Këto janë tema, që ndonjëherë kanë prirjen të shkojnë nga mendja në stomak e më pas bëhen më të vështira, por mendoj se Bullgaria si anëtare e BE është e pjekur dhe ka gjithçka. I nevojitet për të kujtuar veten, kur gjendej në të njëjtën pozitë. Të nxitë së bashku me Maqedoninë e Veriut për të dalë nga kjo situatë. Kjo është qasja ime për këtë. Do të thoja që qëndrimi ynë si Shqipëri është qëndrim për të cilin askush nuk duhet të na ketë zili. Jemi mbërthyer, gjendemi mes dy miqve, por gjërat janë këto që janë dhe procesi është i ndërtuar në një mënyrë të tillë, që duhet respektuar ashtu siç është. Nuk jemi këtu për të mbajtur anë, jemi thjesht duke shpresuar e mbështetur faktin që të dyja të flasin e të flasin dhe ta zgjidhin mes tyre. Nëse është nevoja, jemi gati të ndihmojmë, por ndihma jonë është thjesht të vazhdojmë t’iu themi ‘ju lumtë flisni, komunikoni, gjeni një mënyrë’. BE po bën një përpjekje të jashtëzakonshme, të gjithë po përpiqen të mbështesin, por në fund iu takon bullgarëve dhe Maqedonisë së Veriut. Për më shumë, ju takon vetja, nuk kam ç’ju duhem unë”, ka thënë Rama.
