Kryeministri i vendit Edi Rama ka inspektuar ditën e sotme xhaminë e restauruar të Et’hem Beut’, në qendër të kryeqytetit.
Kryeministri është shoqëruar nga ministrja e Kulturës, Elva Margariti dhe kreu i KMSH, Bujar Spahiu. Rama u shprehë ndër të tjera se me zgjatjen e fashës orare besimtarët mund të kryejnë të gjitha ritualet,gjithashtu ai tha se ky muaj do të jetë shumë i rëndësishëm dhe energjik.
“Me zgjatjen e orarit do të keni mundësi të kryeni të gjitha ritualet. Kam shumë besim që ky muaj do të jetë energjizues, dhe që me daljen nga tuneli i pandemisë, me hapjen e sezonit turistik, të gjitha punëve për njerëzit, të dalë nga ajo që thoni ju se pas vuajtjes së madhe vjen lehtësimi. Do të kemi një perspektivë krejt tjetër. Ju uroj të gjithëve një muaj agjërimi të pranuar dhe Zoti qoftë me ju e me shqiptarët”, tha kryeministri i vendit Edi Rama.
Ndërkohë që me anë të një postimi në rrjetet sociale, shoqëruar me videon nga xhamia është shprehur se ky xhevahir i gjallë, i Trashëgimisë sonë Kulturore është kthyer me gjithë shkëlqimin e vet.
Ndërkohë, në postimin e tij në “Facebook”, shoqëruar me videon gjatë inspektimit, Rama thekson se “Ky xhevahir i Trashëgimisë sonë Kulturore është kthyer në krejt shkëlqimin e vet, pas një pune të gjatë milimetrike, që ka nxjerrë gjithçka fshihej nën shtresat e kohërave dhe sot është vendi ideal, për të uruar Muajin e Madh të Ramazanit me besimin e madh se ky do të jetë edhe një muaj i afrimit vendimtar me dritën në fundin e tunelit rraskapitës të pandemisë”.
