Kryeministri Rama, i shoqëruar nga zëvendësministrja e Ekonomisë dhe Financave, Dajna Sorensen, ishin në qendrën Rajonale të Formimit Profesional në Elbasan, ku u takuan me 451 kursantë që po trajnohen nëpërmjet kursit “Start Smart”, ku zhvillohen kurse profesionale në profile të ndryshme.
Kjo qendër është një instrument i rëndësishëm për profilizimin apo riprofilizimin e çdo punëkërkuesi të papunë, me qëllim orientimin sa më të mirë për punë dhe profesion.
“Ne i kemi orientuar të gjithë studentë që duan të marrin kurse formimi profesional të fillojnë me Start smart-in për të parë kush janë aftësitë e tij, prirjet e tij, që t’i bëhet më e lehtë pjesa e formimit. Krahas saj marrin disa aftësi të buta për punën në grup, zhvillojnë qëndrueshmërinë e tyre,” – u shpreh një nga përfaqësueset e Zyrës së Punës.
Kursantët e trajnuar pas përfundimit të kursit orientohen drejt punësimit ose drejt formimit profesional të mëtejshëm.
“Kjo është një gjë e domosdoshme, sepse e keni parë vetë, që shkon të kërkosh punë e ju thonë çfarë di të bësh e ngre supet. Ndërkohë që këtu, duke marrë këto aftësitë bazë e duke pasur dhe njohuri profesionale bazë, do ta keni shumë më të lehtë për t’u integruar në tregun e punës dhe duke qenë edhe më të kualifikuar, patjetër që edhe pagat do të jenë më të mira që në fillim”- tha kryeministri Rama, ndërkohë që synimi për këtë qendër formimi është profilizimi i saj drejt industrisë ku edhe bizneset në këtë rajon kanë më tepër nevojë.
Kryeministria në njoftimin e shpërndarë për mediat thotë se deri në fund të marsit 2019, në të gjithë vendin janë përfshirë në këtë kurs 2314 punëkërkues të papunë.
Biseda:
Kursanti: Kjo lojë tregon bashkëpunimin dhe sa mirë sa mirë funksionojmë ne si grup me njëri tjetrin.
Rama: Ju për çfarë keni ardhur për të loz apo për të mësuar?
Kursanti: Për të mësuar, por më anë të këtyre lojërave mësojmë si të bashkëpunojmë me njëri tjetrin
Rama: Ju për çfarë po trajnohemi?
Kursanti: Unë për kurs si hidraulik
