Kryeministri Edi Rama ka reaguar ashpër lidhur me takimin online të kreut të PD Lulzim Basha me kryekomisioneren e BE Mariya Gabriel.
Sipas Ramës është një ndërhyrje në fushatën elektorale, ndërsa i është drejtuar Brukselit për një përgjigje zyrtare. Ai i ka quajtur komisionerët si persona që harxhojnë kohën dhe taksat e popujve të Europës.
“Dikush në Bruksel duhet t’u thotë komisionerëve që harxhojnë kohën e punës së paguar nga taksat e popujve të Europës, për të bërë videomuhabete elektorale me Lulëzim Bashën, se kjo quhet ndërhyrje në fushatën e brendshme elektorale të një vendi kandidat për në BE! Në dijeninë time Komisioni Europian nuk e ka zakon të fusë hundët në fushatat elektorale dhe unë pres ta mësoj zyrtarisht e publikisht nga Brukseli, nëse e kam unë gabim e ndoshta komisionerët kanë vërtetë të drejtë të bëhen palë kur popujt e Europës zgjedhin qeveritë e tyre!”, shkruan Rama.
Kreu demokrat Lulzim Basha, ka rikthyer edhe njëherë në vëmendje programin e Partisë Demokratike “Shqipëria fiton Arsimin”.
Në një takim të përbashkët me Komisioneren e BE, Mariya Gabriel dhe përfaqësues të Universitetit ‘Modul” të Vjenës, Basha bëri premtimet e radhës në kuadër të fushatës elektorale.
Komisionerja Gabirel tha se “ju siguroj që, ne do të përdorim të gjitha mjetet dhe iniciativat në dispozicion përfshirë agjendën e ardhshme – Agjenda e Ballkanit Perëndimor në Inovacion/Zhvillim e sipër, Kërkim Shkencor, Kulturë, Arsim dhe Rini për të avancuar bashkëpunimin tonë dhe për të rritur rimëkëmbjen socio-ekonomike dhe konvergjencën me BE”.
