Kryeministri Edi Rama mblodhi pasditen e sotme Komitetin Kombëtar të Rindërtimit.
Shefi i qeverisë tha se deri më 16 dhjetor, do të ketë një raport paraprak për dëmet e tërmetit të 26 nëntorit.
Më pas Rama tha se do të ketë një raport të dytë, ndërsa përfundimtari do të dalë brenda janarit.
Gjithashtu kryeministri bëri me dije se po punohet për një ligj të posaçëm për rindërtimin dhe drafti i parë është gati.
“Nuk ka një raport paraprak të dëmeve, një grup po punon. Raporti i parë paraprak synohet të paraqitet më 16 dhjetor, por edhe çfarë na u tha nga partnerët, raportet post-katastrofë kërkojnë kohë. Do ketë një raport paraprak, një raport të dytë dhe pastaj një raport të plotë besoj në janar, për t’u hapur rrugë donacioneve. Për transparencën po punojmë për një raport të posaçëm me të dhëna të detajuara për qeverinë, donacionet dhe përfituesit. Besoj në mbledhjen e ardhshme, pas një jave, mund ta prezantojmë. Po përgatitet ligji i posaçëm për rindërtimit, që ka për qëllim të krijojë një kuadër ekskluziv për të gjitha aspektet që kanë të bëjnë me rindërtimin. Një grup pune po merret me këtë non-stop dhe një draft të parë e kemi gati. Tani po bashkëpunojmë dhe me Komisionin e Ligjeve për ta çuar përpara. Aktualisht kemi 366 dosje projektesh për rindërtim”, tha Rama.
Kreu i qeverisë bëri me dije gjithashtu, se 660 familje janë përfituese të bonusit të qirasë.
Rama bëri edhe një bilanc të dëmeve, duke thënë se janë evidentuar 261 pallate të dëmtuara rëndë dhe të pabanueshëm në momentin aktual, 2237 banesa të pabanueshme dhe 851 pallate me dëmtime të mesme apo të lehta.
