Në një bashkëbisedim me studentë të universitetit “Eqrem Çabej” në Gjirokastër, kryeministri Edi Rama tha se një ndër problemet kryesore janë “pedagogët”, të cilët kanë tituj akademikë fallco dhe tregtojnë libra në këmbim të notës.
Shefi i qeverisë iu drejtua rektorit të universitetit të Gjirokastrës duke i kërkuar të hartojë projekte, të cilët do të mbështeten financiarisht.
“Për të kërkuar para është gjëja më e thjeshtë. Në Gjirokastër është rregulli numër një që fillon biseda me bashkëbiseduesin dhe përcakton edhe rregullin se si vijon dhe mbaron. Investimet do t’i bëjmë tani në nivel projektesh. “E vërteta është që ke marrë përgjigjen dhe të kamë thënë shkruaj në platformë në Shqipëriaqëduam.al. Ne nuk i dimë të gjitha dhe mësojmë duke dëgjuar tjetrin.
Sa i takon kartës kemi vendosur një afat tek pakti për Universitetin, sepse nuk është një program i shkruar qeverisës, por është një program i detajuar angazhimesh që ne duhet t’i kthejmë në një kontratë. Titujt shkencore sa të vërtetë janë, tregtia e librit në këmbim, të notës si do frenohet dhe si do vlerësohet pedagogu nga studenti. Këto ju më duket i keni harruar, por këtë do ua përsëris vazhdimisht. Shumica e pedagogëve janë të denjë. Nuk e përjashtojnë se pedagogët e denjë janë të shumtë dhe nuk duhet të futen me një thes me disa sharlatanë, të cilët nuk janë të paktë në numër. Nuk shoh në asnjë universitet, që të këtë nisur procesin e verifikimin e titujve akademikë”- tha Rama.
