Kryeministri Edi Rama në një takim me 373 studentët ekselentë fitues të platformës “Punë të Mbarë”, pjesë e administratës publike, theksoi se duhet të hyjnë në administratë, që administrata të bëhet si ata dhe jo ata si administrata.
Rama u ndal edhe te protesta e studentëve, duke e cilësuar si një nga arsyet kryesore të punësimit të studentëve ekselentë.
“Shumë faleminderit është kënaqësi ky moment sepse kurorëzohet një nga pikat më të rëndësishme të një procesi që vazhdon. Pra që ka të bëjë me krijimin e një mundësie reale për të gjithë për të shërbyer në shtetin shqiptar.
Është një vit për të hequr mungesën e eksperiencës. Ne kemi adoptuar një ligj nga BE, dhe ky ligj thotë që për të marrë një vend pune duhet të paktën një vit pune. Në kushtet tona kjo është një domosdoshmëri, jo një nevojë, por një domosdoshmërti që administrata të marrë fytyrën e më të mirëve.
Më vjen shumë mirë që kjo mundësi më në fund na u dha dhe na e dha protesta e studentëve dhe ka qenë një përpjekje më e vjetër, por që ligji na e ndalon.
Zbatimi i ligjeve sidomos për sa i përket administratës publike, është një nga pikat më kyçe.
Kështu që u desh protesta që ne ta shfrytëzonim dhe t’i hapnim rrugë. Keni mundësi që brenda vitit të parë të punës, të njihni vendin e punës. Ashtu si kundër ky është vetëm fillimi i këtij procesi që lidhet me ripërtërimin e administratës.
Vendet e lira në Hipotekë, ALUIZMI dhe Inspektoriate nga më të ndryshme do të jenë në dispozicion të më të mirëve. Të sjellim disa vyrtyte të munguara që do ripërtërijnë administratën. Ajo që është kryesorja është që ju sillni një administratë idealizimi. Ju nuk keni zgjedhur të justifikoheni, apo të mjaftoheni me 5 ose 6, por përkundrazi keni zgjedhur të ulni kokën dhe të vraponi dhe kjo ju bën një shembull për t’u respektuar.
Por jeni një shembull për të gjithë të tjerët. Sigurisht që gjatë rrugës disa do shkëlqejnë, disa do jenë shumë të mirë, disa nuk do ia dalin dot. Nëse sot jeni 373 ai 374 nuk është këtu se nuk ka një rezultat të mirë. Ju jeni më të mirët. Ju po hyni në administratë që administrata të bëhet si ju, jo ju të bëheni si administrata.”- tha Rama.
