Kryeministri Edi Rama në fjalën e tij në takimin me deputetët për përgatitjen e fushatës së vitit të ardhshëm u shpreh në lidhje me sigurinë në shkolla deklaroi se Inteligjenca Artificiale do të implementohet në çdo sistem arsimor në vend.

Ai nënvizoi se ky sistem i ri do të jetë mjaft i dobishëm, duke bërë që asgjë të mos shpëtoj nga ajo që ndodh në shkollë, në mënyrë që siguria dhe cilësia arsimore të jetë në një tjetër nivel.

“Një gjë dua t’ua them me siguri të plotë bazuar në fakte e jo opinione, Shqipëria dhe mundësitë që kemi sot janë të atilla që asgjë nuk është e pamundur për ne, për të bërë që në rrugën drejt Shqipërisë 2030 t’i përmbushim edhe ato gjëra që janë të pa përmbushura, që nga pagat e mësuesve që me patjetër duhet të rriten ende deri te detajet e domosdoshme të gjithë procesit që sot mungojnë dhe për t’i vënë pikën te rritja domethënëse të kapaciteteve të sigurisë që ne do e bëjmë realitet me atë projekt që tha ministri. Ne kemi kamera në shkolla, por janë të pamjaftueshme dhe patjetër duhen pasuar me një sistem monitorimi me kamera të gjithë mjedisit të brendshëm të shkollës, gjitha klasave dhe jo vetëm monitorimi po edhe përmes inteligjencës artificiale për t’i dhënë në kohë reale ekipit drejtues të shkollave një sintezë të problematikave të shfaqura dhe në këtë mënyrë ato fenomene që sot i luftojmë me sy, me këtë ndërveprim, do mund t’i luftojmë duke pasur një instrument shumë të rëndësishëm, që faktikisht i jep oficerit të sigurisë në shkollë shumë më tepër se ç’mund të kapë me dy sytë e tij”, tha ai.

Por sa real është ky premtim, kur shumë objekte arsimore nuk kanë minimumin e kushteve si: ngrohja nëpër shkolla, mungesa e infrastrukturës, mungesa e godinave, shkollat me tre turne etj. Premtimet për futjen e teknologjisë nëpër shkolla kërkojnë investim të madh gjë që aktualisht nuk është bërë edhe pse kryeministri Rama e premton në çdo fushatë zhvillimin e arsimit. Premtimi për zhvillimin e arsimit e futjen e teknologjisë në objekte arsimore është një premtim i ricikluar çdo herë që ka zgjedhje në vendin tonë. Aktualisht vetëm disa shkolla kanë tableta të cilat janë të vendosura në disa shkolla të kryeqytetit si “Sami Frashëri”, ku edhe ato nuk përdoren nga nxënësit. Pyetja tjetër që shtrohet është sa gati është arsimi shqiptar për futjen e teknologjisë nëpër shkolla? Sa të trajnuar janë mësuesit, për shkak se shumë mësues janë në moshë të madhe, kjo sepse vendi ynë po e vuan nga mungesa e profesionit të mësuesit. Kjo e konfirmuar edhe nga vetë qeveria Rama, ku për shkak të kësaj situate ulën mesataren për studentët që kandidojnë për mësuesi si dhe dhanë disa rrethana lehtësuese si bursa. Ndaj qeveria Rama duhet të jetë më i kujdesshëm në premtime elektorale.