Diferencimi i bërë nga BE për vaksinën ndaj vendeve të Ballkanit Perëndimor merr sërish kritikën e kryeministrit Rama. Sipas tij, ky trajtim është i papranueshëm në çdo aspekt, edhe pse pavarësisht kësaj, shton se Shqipëria ia doli që të siguronte marrëveshjen.
Rama ka njoftuar se është arritur parimisht një marrëveshje me kompaninë Pfizer për të siguruar doza të vaksinës anti-COVID, proces i cili do të nisë në muajin janar. Kjo arritje, për kreun e qeverisë ka ardhur vetëm si rezultat i diplomacisë shqiptare dhe kontakteve në Neë York dhe jo mbështetjes së BE-së.
“Në kushtet skajshmërisht të vështira si pasojë e kërkesës globale marramendëse dhe sasisë ende tejet të vogël të prodhimit, kemi dakordësuar në parim pas kontaktesh intensive nga të katër anët, tekstin e marrëveshjes me Pfizer për të nisur vaksinimin në janar! I papranueshëm moralisht, polikisht, logjikisht diferencimi që BE-ja i bëri Ballkanit po ia dolëm sidoqoftë me diplomaci e me këmbëngulje të mos mbetemi mbrapa askujt. Dhe nuk do të ndalemi deri në sigurimin e dozës së fundit”, shkruan Rama.
Ai ka shtuar edhe një reagim për opozitën, që e ka akuzuar se nuk ka bërë asgjë për të siguruar vaksinën anti-COVID.
“Fjalët mbrapsht atyre që vazhduan me sharje e akuza”, shkruan mes të tjerave Rama.
Më herët, Rama tha se është në bisedime dhe me kompaninë AstraZeneca dhe në fund me Moderna-n. Kjo marrëveshje është arritur pas një vizite 4 ditore në SHBA të kryeministrit Edi Rama në fillim të muajit dhjetor, ku ka njoftuar se ka pasur një kontakt të drejtpërdrejtë me bosin e Pfizer, Albert Burla, në qendrën e kompanisë prodhuese të vaksinës në Nju Jork.
/Gazetareforma.com/
