Aeroporti i Kukësit tashmë prej vitesh është kthyer në çështje të nxehtë, pasi është nisur disa herë, por deri më tani nuk ka përfunduar ende.
Megjithatë mesa duket këtë herë ka marrë një rrugë të mirë, pasi ditën e premte, kryeministri Rama do të shkojë në Kukës, pikërisht për të inauguruar fillimin e punimeve në aeroport.
Këtë lajm e ka bërë të ditur një prej personave që mendohet si kandidat i PS-së në zgjedhjet e ardhshme lokale dhe bëhet fjalë për Safet Gjicin. Përmes një statusi në rrjetin e tij social, Gjici nuk ka lajmëruar vetëm vizitën e kryeministrit, por gjithashtu ka ftuar edhe qytetarët e Kukësit që të marrin pjesë në takim, pasi sipas tij ky projekt do t’i hap mundësi shumë të mira qytetit.
Në statistikat që Gjici bën publike, thuhet se në fazën fillestare projekti do të hapë 220 vende të reja punë, ndërkohë që deri në mbylljen e tij do të punësohen 12000 persona.
Gjithë kjo fuqi e madhe punëtore duhet pasi vlera e aeroportit është lajmëruar të jetë 8 milionë euro dhe ka për të përballuar një fluks të tillë lëvizjeje që mund të shkojë deri në 300 mijë pasagjerë në vit.
Këto janë statistika të dala nga ana e Safet Gjicit, megjithatë presim përfundimin e punimeve për të bërë edhe balancat e duhura.
Postimi i plotë:
Ftoj të gjithë banorët e Kukësit, kudo që ndodhen, që të bëhen pjesë e takimit që do realizohet këtë të premte, ku do jetë i pranishëm edhe kryeministri i Shqipërisë z.Edi Rama.
Takimi do të mbahet në orën 14:30 tek Aeroporti, ku z.Rama do të inaugurojë punimet për rikonstruksionin dhe funksionalizimin e aeroportit të Kukësit.
Ky është një nga investimet më të rëndësishme për Kukësin, që do të sjellë zhvillim ekonomik e social të Kukësit tonë.
Si i tillë, prej tij përfitojnë të gjithë, ndaj ju ftojmë të bëheni pjesë e këtij eventi të rëndësishëm.
Aeroporti Ndërkombëtar i Kukësit, do të ketë një investim, ku vlera e rehabilitimit do të arrijë në 8 milionë euro.
Do punësohen, fillimisht, 220 persona ndërsa në fazën finale, 12 mijë persona.
Fluksi i lëvizjeve parashikohet të arrijë në 300 mijë pasagjerë në vit.
Ndërkohë, do të sjellë çmime të ulëta dhe shërbime cilësore.
Në flasim me vepra, jo fjalë boshe dhe përgjumje.
Synimi është puna dhe veprat, për Kukësin, jo demagogjia!
#TaGëzojmëSëBashku!
#ForcaKukësi
#MëKukësinDhePërKukësin
#PërKukësinQëDuam
#PërBashkinëQëDuam
