Kryeministri i vendit Edi Rama gjendet sot në Gjirokastër, ku po zhvillon dhe një takim me qytetarët. I ndodhur në prag zgjedhjesh, Rama e pranon se nuk ka bërë mjaftueshëm për Gjirokastrën, duke i’u kërkuar qytetarëve sërish kohë për të vijuar më premtimet e vjetra të dhëna kohë më parë.
“Unë hyj tek të pakënaqurit, pasi mendoj se ka shumë ende për të bërë, pasi koha nuk pret në sensin e viteve që kalojnë dhe se çfarë kemi bërë nuk vlen për të kërkuar që njerëzit të jenë të lumtur. Por kjo vlen vetëm për të kuptuar se rruga është e duhura, drejtimi është i duhuri dhe duhet të këmbëngulim e të vazhdojmë drejt.”, tha ai nga ambientet e shtëpisë “Kadare”.
Më tej Rama u ndal dhe tek pasuria kulturore e Gjirokastrës, për të cilën tha se bërë një marrëveshje me Turqinë për të investuar në mënyrë të konsiderueshme te objektet e trashëgimisë kulturore.
“Ata kanë ndërhyrë në objektet e kultit, ajo që i kam kërkuar prej disa kohësh është që eksperienca e tyre në restaurimin e zonave historike dhe kapacitetet financiare janë në kushtet që të japin një dorë dhe këtu. Kemi rënë dakord për Beratin dhe Gjirokastrën të japin një dorë”, tha Kryeministri.
Një detaj i rëndësishëm për t’u përmendur është se kryeministri i vendit, kur vjen puna te fushata elektorale, nuk pengohet aspak nga situata kritike e pandemisë që gjendet vendi.
