Ditën e sotme Kryeministri i vendit Edi Rama ka mbajtur një konferencë në Lalz ku ka folur në lidhje me bilancin e sezonit turistik veror. Gjatë fjalës së tij gjatë konferencës Rama nuk ka nguruar të shprehë kritika për të vetët, ku në sy ranë kritikat e shumta për kryebashkiakun e Vlorës Dritan Leli. Kujtojmë se midis Ramës dhe Lelit pati një krisje pasi ky i fundit nuk pranoi të dorëzonte drejtimin e bashkisë për të kandiduar për deputet. Kryeministri kritikoi qytetin bregdetar për performancën e këtij viti në turizëm dhe faktin që ka zhgënjyer me pritshmëritë për pastërtinë. Siç bëri dhe më herët gjatë mbledhjes me kryetarët e bashkive, Rama shpalli kampione për pastërtinë Bashkinë e Lezhës, të drejtuar nga ish-deputeti i PS Pjerin Ndreu, ndërsa theksoi se edhe Tirana nuk është më një simbol i pisllëkut, pas punëve që janë kryer në terren.
“Kemi qenë një vend dhe kjo gjë ka vazhduar edhe për disa vite që bënim lajm për pisllëkun. Që dilnim nëpër mediat e huaja si një vend pis, i ndotur. Jo shumë larg që këtu kemi pasur një ndër gangrenat më të mëdha të Shqipërisë dhe kontinentit europian. Fushën e mbeturinave në Durrës që bënte lajm çdo verë. Kemi pasur këtë vit falë punës këmbëngulëse, për të cilin kishim filluar punën një vit më parë, siç kemi filluar punën për vitin e ardhshëm nën drejtimin e ministres së mjedisit dhe shembullit inkurajues të një bashkie, më konkretisht bashkisë së Lezhës, sa i përket pastërtisë. Sot me përjashtimin spektakolar të Bashkisë së Vlorës mund të themi se kemi pasur një sezon jo më të pastër se ndonjëherë, se në krahasim me pisllëkun që kemi qenë, është një sezon realisht i pastër. Duke filluar nga Tirana, të gjitha përshtypjet e të anketuarave për mendimin mbi Tiranën fillojnë me pastërtinë. Një kryeqytet që ishte simbol i pisllëkut, në ato katër vite që ra në gjumë së bashku me atë që gërhiste, tashmë është fakt që është i pastër”, tha Rama.
