Autostrada Prishtinë – Hani i Elezit, që lidh Kosovën më Maqedoninë, do të hapet për qarkullim në muajin maj, lajmin e ka bërë të ditur ministri i Infrastrukturës dhe Transportit të Kosovës.
Katër vite më parë në një ceremoni shtetërore ishe prerë shiriti i fillimit të punimeve për ndërtimin e autostradës që do të lidh Prishtinën me Shkupin. Atë kohë për këtë vepër ishin thurur fjalët më të mëdha, duke e cilësuar edhe si projektin më me vlerë që po bëhej në Kosovë. Ishte premtuar se shiriti inauguruese të pritej në fund të vitit 2018. Por kjo nuk ka ndodhur, punimet do të vazhdojnë të paktën deri në maj.
“Punimet janë drejt përfundimit. Përurimi i saj do të bëhet diku në fund të muajit maj,” – kanë thënë në MIT.
Autostrada Prishtinë- Hani i Elezit, ka një gjatësi prej rreth 60 kilometrash, buxhetit të Kosovës pritet t’i kushtojë 700 milionë euro, por kontrata mes Qeverisë dhe konsorciumit nuk është bërë asnjëherë publike.
Konsorciumi turko-amerikan “Bechtel-Enka”, është kompania e cila po ndërton këtë autostradë.
