Kjo e diel ka shënuar një fluks të madh lëvizjesh drejt bregdetit të Lezhës dhe Velipojës, duke sjellë trafik të rënduar në rrugët kryesore.
Qindra pushues janë nisur herët në mëngjes drejt plazheve, por rruga është kthyer në një sfidë për shkak të radhëve kilometrike të automjeteve, veçanërisht në aksin kombëtar Laç–Lezhë.
Që prej orës 10:00, segmenti më problematik mbetet rrethrrotullimi i Fushë Milotit, ku mjetet lëvizin me ritëm tepër të ngadaltë ose qëndrojnë të bllokuara. Temperatura përvëluese mbi 40°C e bëjnë pritjen edhe më të vështirë për drejtuesit dhe pasagjerët.
Situata është përkeqësuar më tej nga mbyllja e urës së vjetër të Milotit, e cilësuar e rrezikshme për shembje.
Ky bllokim ka detyruar qarkullimin të përqendrohet vetëm në një itinerar të vetmuar, duke krijuar ngërç në këtë nyje kyçe të lidhjes me veriun dhe bregdetin e Adriatikut.
