Një tjetër tragjedi në vendin e punës ka tronditur kryeqytetin. Rreth orës 09:30 në zonën e Kinostudios, 66-vjeçari Rrahman Mija, punëtor në një firmë ndërtimi, ka rënë nga një lartësi gjatë kryerjes së detyrës së tij, duke humbur jetën në vendngjarje.
Ky është aksidenti fatal i dytë brenda pak ditësh, që rikthen në fokus mungesën e masave efektive për sigurinë e punonjësve.
Vetëm më 6 gusht, në zonën minerare të Bulqizës, 60-vjeçari Fari Veliu humbi jetën pasi u zënë nën masivin e kromit që shembet papritur gjatë punës, duke mos pasur asnjë mundësi shpëtimi. Lëndimet e marra rezultuan fatale, duke i marrë jetën.
Dy humbjet e fundit theksojnë seriozitetin e situatës në lidhje me kushtet e sigurisë në punë, ku ende nuk po ndërmerren masa konkrete për të parandaluar tragjeditë e përsëritura.
Sektoret e minierave dhe ndërtimit vazhdojnë të jenë më të rrezikuarit, me një numër të lartë fatalitetesh. Sipas të dhënave të Inspektoriatit të Punës, në gjashtëmujorin e parë të këtij viti janë regjistruar 99 aksidente në vendin e punës, nga të cilat 20 kanë përfunduar me fatalitete.
Shkaqet kryesore të këtyre aksidenteve janë puna në lartësi, shembjet në galeritë minerare, aksidentet me makineri prodhimi dhe mjetet e transportit. Kjo situatë kërkon ndërhyrje urgjente për të mbrojtur jetën dhe sigurinë e punonjësve në vendin e punës.
