Forca të shumta policie janë vënë re pasditen e sotme në qytetin e Elbasanit. Agjentë dhe oficerë policie janë shpërndarë në terren për kontrolle të imtësishme në këtë qytet. Duke marrë shkasë nga ngjarjet e fundit që tronditën Elbasanin, ku brenda pak kohësh janë ekzekutuar dy persona, policia ka ngritu fillimisht postbllok në aksin Elbasan-Bradashesh, për të vazhduar më pas edhe në disa lagje të tjera të qytetit. Gjithashtu mësohet se një postbllok policie është vendosur në afërsi të vendit ku u ekzekutua pak ditë më parë 41 vjeçari Everest Çaka. Kujtojmë se ende nuk ka autor të dyshuar për krimin, ndërsa shtojmë se një prej të shoqëruarve për këtë krim ka arritur të arratisej.
Ndërkohë që në orët e para të mbrëmjes kanë nisur kontrollet policore edhe në disa lagje të qytetit të Elbasanit.
Kujtojmë se më 11 maj një ngjarje e rëndë e tronditi qytetin e Elbasanit, ku një person është ekzekutuar në lagjen “Skënderbej” në makinën e tij. Personi që mbeti i vrarë është Everest Caka i njohur edhe si Ibrahim Çaka, ndërsa në momentin që ka ndodhur vrasja ai ka qenë duke lëvizur me mjetin e tij tip “Opel”.Po ashtu në momentin që është ekzekutuar me breshëri plumbash ai ka qenë i shoqëruar edhe nga bashkëshortja e tij Silvana Çaka e cila mori plagë të lehta dhe u transportua në spitalin e Elbasanit, jashtë rrezikut për jetën.Kjo ngjarje është ende pa autor!
