Problemt e shumta të shëndetësisë shqiptare po reflektohen edhe më shumë gjatë pandemisë që po kalojmë me skandalet që dalin në dritë ditë pas dite dhe shkeljet e shumta që në raste i kanë bërë vetë,jekët dhe infermierët. Burokracia e pafund e sistemit shëndetësor është bërë një pengesë për qytetarët që kanë të shtruar familjarë e më tepër ata që janë duke u trajtuar për COVID, me të cilët as nuk lejohen të komunikojnë. Ka qenë një qytetare që ka denoncuar Qendrën Spitalore Nëne Tereza se i kishin vjedhur sendet e të atit. Ajo deklaroi se sendet i janë kthyer vetëm pasi bëri denoncimin në media.
“I mora sendet e mia. Erdha dje për t’i marrë nuk mi dhanë, tani i nxorën pas denoncimit në media tani i morëm. Më thanë në mëngjes nuk i ke këtu, por pastaj ma dhanë portofolin me lekë. Tani që m’i dhanë nuk më thanë asgjë. Kam qenë e para këtu në orën 10 dhe më thanë nuk i ke këtu. Këta gënjejnë vetëm gënjejnë . Edhe ushqimet nuk i ka marrë babai. Është koordinatorja që i kishte, jo mjekët. Ai është me oksigjen, është i vjetër. Dita e dytë sot“, është shprehur qytetarja.
Ndërkohë, ka ardhur edhe reagimi i QSUT që ka thënë se zonja në fjalë nuk ka pasur me vete kartën e identitetit për të tërhequr sendet e të atit dhe pacienti ka ndërruar pavion gjë që ka sjellë edhe ngatërresën. Të paktën qytetarja në fjalë i mori sendet që i takojnë, por të shumta janë rastet kur familjarët nuk i marrin dot sendet e të afërmve që janë të shtruar. Madje rasti më flagrant ka qenë kur një pacienti që humbi jetën nga COVID, iu vodh karta e kreditit nga portofoli.
Reagimi i QSUT
“Pershendetje te nderuar,
Me poshte nje sqarim per mediat lidhur me intervisten e dhene sot nga nje zonje qe pretendonte se i ishin vjedhur sendet e babait.
Qendra Spitalore Universitare “Nënë Tereza”, në vijim të akuzave të hedhura nga një zonjë sot në oborrin e spitalit, mbi sendet personale të të atit, dëshiron të sqarojë publikun si vijon:
Pacienti R. V është paraqitur në Urgjencën e Shërbimit Infektiv më dt 14 Shkurt 2021 në orën 12:45 dhe regjistruar në regjistër me nr 990.
Në Urgjencë, në zbatim të Urdhrit nr. 44 pacientit i hiqen të gjitha sendet me vlerë dhe ruhen në vendin e paracaktuar në Urgjencë sipas proces verbalit dhe transferohet në pavion në kat 3.
Në dt 15 Shkurt 2021, në orën 17:23 në zbatim të urdhrit për transferim sipas listës respektive referuar nga Shefja e Sherbimit, pacienti R. V transferohet nga kati 3 i Shërbimit Infektiv-Njësia Covid 1 për në Njësinë Covid 3 -Zona B (shtrimi nr 14 në listën e transferimeve).
Në pavion dorëzohet me proces verbalin përkatës.
Sot më dt 16 shkurt 2021 paraqitet një zonjë e cila prezantohet si e bija e pacientit për tërhequr sendet personale. Kryeinfermierja i kërkon kartën e identitetit të cilën nuk e kishte me vete. Zonja në fjalë rikthehet e pajisur me kartë identiteti dhe paraqitet tek Kryeinfermierja e Urgjencës Infektiv e cila i dorezon sendet personale të dëshmuara dhe në procesverbalin e firmosur nga vetë ajo. Njoftojmë qytetarët se pranë Drejtorisë Qendrore të Qendrës Spitalore Universitare “Nënë Tereza”, ndodhet Zyra e Marrëdhënieve me Publikun, ku ata mund të drejtohen për çdo paqartësi dhe ku do të marrin të gjithë informacionin e nevojshëm.”
