Sot në Tiranë protestohet kundër rritjes së çmimeve, duke nisur nga nafta e deri te produktet ushqimore. Përgjatë këtyre ditëve ka patur protesta edhe në qytete të tjera të vendit. Qytetarët kërkojnë uljen e çmimit të naftës dhe produkteve të shportës. Pritet që nëse nuk plotësohen kërkesat, të ketë një përshkallëzim të protestës. Kësaj proteste i është bashkuar edhe ish-deputeti Limoz Dizdari. Ai ka ngritur stendën e tij në bulevardin përballë kryeministrisë, të qëndrës së tij kulturore.
Të shumtë në numër në këtë protestë, janë edhe pensionistët, të cilët duket se janë edhe shtresa më e prekur nga rritja e çmimeve të kohëve të fundit. Disa prej tyre, duke folur për mikrofonin e SYRI TV, janë shprehur edhe për paketën e krizës së Edi Ramës dhe shumë prej 30 mijë lekësh të vjetra që ka dhënë ai për pensionistët.
‘Ai 30 mijë lekëshi i vjetër më revolton më shumë, ai është tallje, nuk mund të tallet. Ne nuk kemi nevojë për lëmoshë’, është shprehur njëri prej tyre. Edhe një tjetër prej protestuesve i është bashkuar këtij mendimi, duke shprehur se janë më të prekurit dhe se pensioni nuk po i del për të blerë asgjë.
Qytetarët kanë paralajmëruar se protesta e sotme do të jetë 24 orëshe, ndërkohë që nuk kanë munguar as mesazhet epike përmes pankartave.
