Kryeministri Edi Rama vendosi ditën e djeshme fashën orare 05:00 dhe 13:00, si orarin e ri për lëvizjen e këmbësorëve, për të shmangur edhe grumbullimet e njerëzve.
Pavarësisht thirrjeve të autoriteteve për distancim social, qytetarët ende nuk janë ndërgjegjësuar.
Në pamjet e siguruara nga “Report Tv”, shihet se qytetarët janë ngjitur me njëri tjetrin duke bërë pazar, ndërsa disa prej tyre nuk kanë asnjë masë mbrojtëse.
Pamjet e mëposhtme janë shkëputur nga Vlora dhe Fieri, qytet ky ku tashmë janë regjistruar 7 raste me koronavirus.
Mirëpo as ky fakt nuk i ka trembur qytetarët, të cilët kanë populluar tregjet dhe nuk respektojnë masat ndaj përhapjes së COVID-19.
Të njëjtën tablo ofroi edhe Lushnja, me tregun e fruta perimeve që gëlonte nga njerëzit që në orët e para të mëngjesit.
Edhe pse në këtë qytet ka ndërruar jetë një person nga koronavirusi, qytetarët sërish nuk janë ndërgjegjësuar për të marrë masa mbrojtëse.
Në Tiranë po ashtu, qytetarët kanë dalë në grupe, duke mos respektuar distancën, ndërsa disa të tjerë nuk kanë masa mbrojtëse.
Gjithashtu u vu re në postën te kryqëzimi te “21 Dhjetori”, që qytetarët nuk respektonin radhën dhe distancën nga njëri tjetri.
Ndërsa Durrësi në orët e para të mëngjesit ishte i qetë, ndërsa furnizimin me ushqime qytetarët e kanë lënë për më vonë.
Që prej ditës së djeshme, efektivët e policisë qëndrojnë përpara dyqaneve dhe farmacive, për të ndërgjegjësuar qytetarët për masat mbrojtëse.
Duke qenë se ndërgjegjësimi ishte i ulët, ditën e djeshme dolën në rrugë edhe makinat e ushtrisë.
Aktualisht në vendin tonë numërohen 70 të prekur nga koronavirusi, mes të cilëve dy viktima dhe një i shëruar.
Tek Infektivi janë shtruar 35 pacientë , tre prej të cilëve mbahen në terapi intensive.
Autoritetet ndërkohë vijojnë me thirrjet për respektimin e rregullave të higjienës dhe distancimit social.
