Zëvendës Kryeministri i Shqipërisë Arben Ahmetaj gjatë fjalës së tij në Kuvend tha se sipas treguesve ekonomikë të vendit tonë ekonomia po performon shumë mirë. Kjo sipas tij llogaritet duke marrë parasysh se gjatë një periudhe të shkurtër kohore vendi ynë kaloi kriza të mëdha si tërmeti i 26 nëntorit, i cili la pas një program të gjatë rindërtimi, pandemia që mbylli aktivitetet ekonomike dhe pushtimi i Ukrainës që solli rritje katastrofike të çmimeve. Ai u shpreh se qeveria ka mbushur gropat që krijuan krizat nga tërmeti te lufta.
“Sot në Shqipëri nuk ka ngadalësim të rritjes ekonomike, vazhdon të jetë galopante, nuk ka rritje të papusisë. Të dhënat e fundit të tregut të punës të INSTAT thonë se pjesëmarrja e forcave të punës është record 72%. Papunësia e rinisë është 20%, është sërish record. Është shumë kollaj të bësh të bardhën të zezë. INSTAT thotë se papunësia ka rënë në 11.3%, është njësoj si përpara krizës së tërmetit. Sa i përket kërkesës, asnjë nga mallrat kryesore të konsumit, përveç karburantit, nuk kanë rënie, por kanë rritje nga 6-10%”.
Sipas tij “ne kemi arritur me politikat tona të mbushim atë gropë që u krijua nga të treja krizat. Në raport referohet me detaje çfarë ka ndodhur me rimëkëmbjen. Biznesi i vogël ka mbushur menjëherë gropën e papuësisë të krijuar nga pandemia. Diskutimi a është kjo qeveri pro apo kundër qytetarit në nevojë dhe a e ka mbështetur apo jo, është pyetje retorike”.
