Në Vlorë është zbuluar një sasi qumështi dhe nënprodukte të tij të kontaminuara me aflatoksinë M1, një toksinë kancerogjene e rrezikshme për shëndetin.
Agjencia Kombëtare e Ushqimit konfirmoi se nga kontrollet e bëra në treg, janë gjetur mostra pozitive nga dy markat më të njohura, Lufra dhe Erzeni.
Nga 26 mostra të marra në periudhën janar-prill 2025, 10 prej tyre ishin pozitive për aflatoksinë, duke e bërë gati 40% të qumështit të kontrolluar të kontaminuar.
AKU ka tërhequr menjëherë produktet e kontaminuara nga tregu, por dyshohet se ato janë konsumuar tashmë.
Çfarë është aflatoksina?
Aflatoksina është një toksinë e prodhuar nga myku që zhvillohet në drithëra si misri dhe gruri. Lopët që ushqehen me foragjere të kontaminuara sekretojnë më pas këtë toksinë në qumështin që prodhojnë. Organizata Botërore e Shëndetësisë e ka klasifikuar aflatoksinën si substancë kancerogjene të grupit 1, e lidhur me rritjen e rrezikut për kancer të mëlçisë, probleme në veshka dhe çrregullime të tjera serioze shëndetësore.
Një fenomen i përsëritur!
Ky rast është vetëm një nga seritë e skandaleve ushqimore që kanë tronditur vendin kohët e fundit.
Skandale të mëparshme përfshijnë mishin e kontaminuar me salmonelë të shitur në KFC, sekuestrimin e 27 tonëve mish të prishur, peshk të ndotur me parazitë, si dhe 13.2 ton akullore të kontaminuara me oksid etileni një tjetër substancë që shkakton kancer dhe leucemi.
Po ashtu, janë raportuar raste me qumësht dhe dhallë të prishur nga kompania “Lufra”, si dhe minj të filmuar mbi thasët e miellit të kompanisë “Diamond”.
Pasojat e këtyre substancave janë alarmante, rrisin ndjeshëm rrezikun për kancer, dëmtojnë sistemin imunitar dhe nervor, si dhe ndikojnë në fertilitet.
Në një kohë kur qytetarët presin masa konkrete, institucionet si Ministria e Bujqësisë dhe AKU vijojnë të heshtin ose të reagojnë me vonesë.
Përballë këtij realiteti të rrezikshëm, ku shëndeti i qytetarëve lihet në mëshirë të fatit, revolta qytetare mbetet e vetmja zgjidhje.
