Shkon në 6 numri i nxënësve të shtruar në spitalin e Tiranës si shkak i helmimit nga gazi. QSUT njofton se 3 pacientë janë paraqitur në Urgjencën e Sëmundjeve të Brendshme dhe 3 të tjerë në Urgjencën e Pediatrisë. Ata janë intoksikuar por janë në gjendje të mirë shëndetësore.
Ky është njoftimi zyrtar për gjendjen shëndetësore të nxënësve të një shkolle private në Tiranë, në lagjen “Don Bosko”, të cilët mëngjesin e sotëm janë helmuar nga rrjedhja e gazit dhe janë dërguar me urgjencë në spital.
Njoftimi i plotë:
Lidhur me gjendjen shëndetësore të nxënësve të intosikuar në një shkollë dhe që janë paraqitur ne QSUT:
Paraditen e sotme, pranë Urgjencës së Sëmundjeve të Brendshme janë paraqitur me ambulancë 3 pacientë të ekspozuar nga gaze, të moshës rreth 15 vjeç.
Tre pacientë të moshës 12-14 vjeç intosikuar janë paraqitur me ambulancë pranë Urgjencës Pediatrike.
Mjeku toksikolog ka kryer konsultën mjekësore dhe ka konstatuar që janë koshiente, paraqesin simptoma të lehta të intoksikacionit si dhimbje koke, të përzjera dhe pak ansioze. Pacientët janë me paramentra stabël, jashtë rrezikut për jetën dhe janë shtruar në pavijon për monitorim.
Dëshmia e nxënëses
Një prej vajzave që u evakuuan pas rrjedhjes së gazit ka treguar për momentin e parë kur kanë ndjerë erën e gazit. Ajo shprehet se orën e parë iu kanë thënë të hapin dritaret, ndërsa më pas kur gjendja është përkeqësuar iu kanë kërkuar të dalin jashtë ku kanë parë nxënës duke vjellë dhe në gjendje të fikëti.
“Unë jam në maturë. Ngrohemi me kaldaja. Orën e parë dëgjuam era gaz. Na thanë hapni dritaret dhe mbajini hapur. Pastaj na thanë dilni jashtë, pini një kafe. Kur po dilnim jashtë pastaj shihnim nxënës duke vjellë, një tjetër i kishte rënë të fikët“, u shpreh ajo.
Pavarësisht se kishin kaluar rreth 2 orë nga ngjarja, ende në ambientin përreth ndihej era e gazit.
Ngjarja ndodhi rreth orës 09:30, në zonën e Don Boskos. Nxënësit si pasojë e rrjedhjes së gazit në sistemin e ngrohjes, kanë pasur dhimbje koke dhe të vjella, ndërkohë që 4 prej tyre kanë përfunduar në spital. Si pasojë e ngjarjes është bërë evakuimi i të gjithë nxënësve. /Gazetareforma.com/
