Ditën e sotme rusët kanë bombarduar një teatër në Mariupol ku ishin strehuar me qindra civilë. Lajmin e ka bërë të ditur Këshilli Bashkiak i qytetit, raporton CNN.
Këshilli Bashkiak i Mariupolit ka postuar një foto të teatrit të qytetit ukrainas në të cilin thuhet se janë strehuar me qindra njerëz, pasi pësoi dëme të mëdha në një bombardim.
Sipas Këshillit, forcat ruse e kanë targetuar me qëllim Teatrin e Dramës në zemër të Mariupolit ndërsa njoftohet se bomba u hodh nga një avion. Nuk ka ende të dhëna për numër viktimash.
Këshilli shtoi në kanalin e tij Telegram: “Është ende e pamundur të vlerësohet përmasat e këtij akti të tmerrshëm dhe çnjerëzor, sepse zonat e banuara të qytetit po vijojnë të bombardohen. Dihet se pas bombardimeve u shkatërrua pjesa qendrore e Teatrit dhe hyrja është shkatërruar.”
Për momentin nuk dihet numri i të vdekurve dhe të plagosurve. Shumë banorë të Mariupolit u fshehën në teatër me fëmijë të vegjël.
Ky teatër ishte një strehë në të cilën banorët e Mariupolit të rrethuar shpëtuan nga granatimet e vazhdueshme.
“Nuk dihet sa njerëz vdiqën nën rrënoja. Tani ka beteja të ashpra. Askush nuk mund të shkojë në rrënoja, nuk e dimë nëse ka të shpëtuar. Dhe më e keqja është se nuk mund t’i nxjerrim nga rrënojat. Shumë banorë të Mariupolit u fshehën në teatër me fëmijë të vegjël”, thuhet në deklaratë.
