Bujar Nishani ka qenë ndër figurat kryesore të Partisë Demokratike që ka dalë kundër Lulzim Bashës pas humbjes në zgjedhjet e 25 prillit. Ai ka komentuar edhe një qeverisje të mundshme Rama-Basha, duke thënë se kjo do ishte tradhëtia më e poshtër që mund t’i bëhet PD-së.
“Ajo do ishte tradhëtia, thika më e poshtër dhe më vdekjeprurëse që do t’i bëhej Partisë Demokratike. Atëherë do tu vinte e drejta demokratëve që të bënin atë që u lind për tu bërë, të merrnin vulën e marrë peng nga zoti Basha sot dhe ta çonin te selia e Partisë Socialiste”, tha Nishani.
I ftuar në “Çim Peka Live” në Syri Tv, Nishani ka folur edhe për mënyrën si është organizuar fushata elektorale, duke thënë se njerëzit që përfaqësojnë Partinë Demokratike në terren janë lënë pa mbështetje nga ana e logjistikës dhe nga ana financiare.
“E dini ju? Njerëzit e Këshillit Kombëtar janë të gjithë në Tiranë. Ata janë të gjithë në Tiranë, sepse janë me vendbanim këtu dhe nuk kanë si të ikin në rreth. Nëse sot kemi një rezultat të tillë në kutitë e votimit, kjo është në gjykimin tim dhe që njoh politikën, elektoratin dhe strukturat e PD, kjo është si rezultat i një sakrifice të jashtëzakonshme të njerëzve që përfaqësojnë Partinë Demokratike në terren, por që janë lënë pa mbështetje, janë lënë të braktisur. Nga ana organizative, nga ana e logjistikës, mbështetjes, njerëzit tanë ishin të pafinancuar. Ata shpirtin e kanë dhënë, por nuk mund ti japin më shumë se sa shpirti i tyre. Dhe për këtë është ai përgjegjës, përgjegjësi kryesor i humbjes”, deklaroi Nishani.
