Greva e urisë e naftëtarëve nuk e shqetësoi qeverinë, por ajo e Ligës së Futbollit e “alarmoi” mazhorancën. Kështu qeveria “tërhiqet” para kërksave të presidentëve të klubeve të futbollit. Këta biznesmenë do të paguajnë më pak taksa, ndërsa futbollistët përjashtohen nga tatimi mbi të ardhurat.
Sot në Kuvend kaloi me shpejtësi projektligji që ka për qëllim, të krijojë lehtësitë fiskale në sport.
Ministrja e Financave, Anila Denaj, duke bërë një prezantim para deputetëve të pikës së gjashtë, të Projektligjit për ndryshime në ligjin për TVSH-në, tha se kjo lidhet me të gjitha investimet në fushën e sportit.
“Qeveria shqiptare po ndërmerr një masë e cila vjen në vijim të disa masave të cilat më parë kanë sjellë një lehtësi për të rritur financimin në fushën e sportit. Më lejoni të sjellë përpara jush në vëmendjen tuaj dy nga këto lehtësime përpara se të shkojmë dhe të bëjmë një prezantim të ligjit që propozojmë sot:
- Rritëm nga 3% ne 5 % shumën e lejuar si shpenzim i zbritshëm për të gjithë sponsorizimet.
- Njëkohësisht, njohim trefish të kësaj vlere si shpenzim të zbritshëm për çdo sponsorizim nga kompanitë me fitim mbi 100 milionë lekë.
Kemi ndërmarrë këto ndryshime, pasi janë ndryshime te cilat nxisin financimet nga vetë bizneset të cilat kanë dëshirë të investojnë ose të financojnë më shumë sportin.
Gjithashtu, përjashtuam të ardhurat personale të sportistëve nga tatimi mbi të ardhurat për 2 vite, sigurisht ne mund të diskutojmë nëse kjo është një kohë e mjaftueshme, por mendoj se është një kohë e cila e lejon këtë sektor të formalizohet”, tha Denaj.
Ndërkaq, u vendos reduktimi i tatimit mbi vlerën e shtuar në nivelin 6 për qind, për furnizimin e shërbimit të punimeve të ndërtimit, për investimet shtetërore ose të klubeve sportive/federatave sportive, në infrastrukturën sportive të përcaktuar në legjislacionin e fushës për sportin.
Nuk ka akoma reagime nga FSHF, nëse do të nisin ndeshjet e Superiores, e cila ka pezulluar aktivitetet.
/GazetaReforma.com/
