Më 9 mars Shqipëria do zgjohej me 2 të infektuar nga COVID-19 dhe tashmë bilanci ka shkuar në 59 të prekur dhe 2 viktima.
Qeveria ka marrë masa të shumta për parandalimin e përhapjes së Coronavirusit, por nuk ka ende një plan konkret rreth zgjidhjes së krizës ekonomike që mund të kalojë vendi si pasojë e virusit.
Deri tani kryeministri Rama ka firmosur vetëm një marrëveshje me Guvernatorin e Bankës Shqiptare, Gent Sejkon, duke shtyrë pagesën e kredive deri më 31 maj 2020, teksa ka thënë se ekspertët po punojnë rreth një plani masash.
“U tha, u bë”! Rama firmos marrëveshjen me Guvernatorin e BSH: Ja çfarë duhet të bëjnë kredimarrësit
Së fundmi, ka reaguar edhe Dhoma Amerikane e Tregtisë që ka ngritur alarmin, mbi hartimin urgjent të një plani konkret për të lehtësuar bizneset, pasi rrezikohet shkatërrimi i ekonomisë.
“Ne i kërkojmë qeverisë së Shqipërisë të hartojë një plan paralel të urgjencës në mbështetje të komunitetit të biznesit për të parandaluar një krizë të thellë ekonomike të shkatërrojë shëndetin ekonomik të vendit”, thuhet në deklaratën për mediat.
Po ashtu, Dhoma Amerikane e Tregtisë i ka rekomanduar qeverisë shqiptare një plan konkret për të lehtësuar bizneset, teksa ka ofruar edhe ekspertizën e saj në hartimin e masave:
1.Shtyrja e afateve për raportimin financiar, pagesat e TVSH-së dhe tatimeve;
2.Eliminimin e detyrimeve fiskale për të paktën tre muaj, dhe për bizneset në sektorin e turizmit gjashtë muaj;
3.Krijimi i një fondi emergjence që do t’i lejojë bizneset të kenë qasje të shpejtë në kapital, përmes granteve ose kredive afatgjata, në mënyrë që bizneset të përballojnë efektin negativ të kësaj periudhe.
Deri tani shtete të ndryshme kanë ndërmarrë nisma e paketa të rëndësishme rreth mënjanimit të krizës ekonomike që mund të shkaktojë virusi.
Qeveria gjermane ka miratuar paketën më të madhe të ndihmës ekonomike të Gjermanisë, me vlerë 550 miliardë euro për kompanitë e ndryshme, duke iu ofruar atyre kredi për të mbajtur bizneset e tyre hapur.
Kryeministri italian Giuseppe Conte, ka miratuar dekretin ‘Cura Italia’ për emergjencën e Coronavirusit, duke ofruar 25 miliardë euro për familjet dhe bizneset.
Ditën e djeshme Britania e Madhe hartoi planin e saj, që parashikon: 1 miliardë paundë ndihmë direkte për familjet në nevojë që shpërndahet menjëherë nga Këshillat Vendore; 3 muaj shtyje të pagesës së kredisë; 330 miliardë paundë para në treg për të ndihmuar biznesin; 25 mijë paundë ‘cash’ për çdo biznes të vogël (pub, bar, dyqan i vogël) së bashku me përjashtim 1 vit nga taksat; një paketë mbështetëse e mundshme posaçërisht për linjat ajrore dhe aeroportet; ndihmë direkt në para për këdo që humb punën në rreth 90 paund në javë.
