Importi i makinave më të vjetra se 10 vite tashmë është i ndaluar në vendin tonë dhe kjo me anë të një ligji që qeveria ka nxjerrë.
Ligji ka qenë i parashikuar të hynte në fuqi që prej datës 1 janar 2019, mirëpo ka hasur një sërë problemesh, pasi sipas qytetarëve ka hyrë në fuqi para kohe.
Ata kanë thënë se e gjithë kjo ka shkaktuar një pakënaqësi të madhe për arsye se makinat e blera në SHBA dhe Kanada nuk janë lejuar që të zhdoganohen, ndonëse ato kanë hyrë në doganë para datës së parashikuar.
Sipas Faxweb, një qytetar shprehet se ditën e nesërme do të protestohet pikërisht për këtë arsye në Doganën e Durrësit.
“Prsh! Jemi një grup qytetarësh të cilët nuk po gjejmë zgjidhje nga instancat doganore. Problemi qëndron për automjetet të cilat kanë hyrë në doganë nga USA-Kanada dhe nuk zhdoganohen pasi ligji doli përpara kohe në fletoren zyrtare. Nesër mendohet për një protestë në Dr. e Doganës Durrës. Ju lutemi për prezencën tuaj!”, – thuhet në mesazhin e mbërritur pranë kësaj redaksie.
