Skandalet në vendin tonë nuk kanë të mbaruar. Ndërkohë që pas rritjes së çmimit të naftës deri në 200 lekë, ne presim nga qeveria shqiptare të ketë një ndërhyrje në të mirë të popullit duke ulur taksat apo duke u vënë gjoba karburanteve e pronarëve të tyre të cilët abuzojnë në mënyrë direkte duke fiksuar e rritur çmimin, qeveria shqiptare bën të kundërtën.
Ajo do të ndikojë akoma më tepër në rritjen e çmimit duke shkaktuar këtë herë një ngritje inflacioni deri në shkatërrim të ekonomisë sonë pothuajse të rrënuar. Qeveria jonë tashmë ka nisur procedurat për të rritur më tej taksat mbi naftën. Dhe jo taksat që shkojnë në buxhetin e shtetit, por ato që përfundojnë në llogaritë e koncesionarëve privatë. Pra jep një koncesion, i cili do të faturohet në xhepat e qytetarëve shqiptarë.
Sipas burimeve nga MCN, “Ministria e Financave, përmes Drejtorisë së Koncesioneve, ka nisur procedurat për të dyfishuar tarifën e kontrollit të pompave në stacionet e karburanteve nga 14 mijë lekë për pompë në vit që është aktualisht në 28 mijë lekë në vit. Kjo tarifë i paguhet kompanisë koncesionare Noa Control nga shoqëritë e karburanteve, por paguesi fundor i saj është konsumatori, pasi pikat e karburanteve e përcjellin koston në çmimin final të naftës.”
Momentalisht Shqipëria ka rreth 25 mijë pompa në stacionet e karburanteve. Pra rritja e tarifës në këto kushte e rëndon drejtëpërdrejtë barrën mbi qytetarët me të paktën 3.4 milionë euro në vit duke përfshirë dhe efektin e tatimit mbi vlerën e shtuar. Por ajo çka bie më shumë në sy është se e gjitha kjo vjen në mes të skandaleve që dalin çdo ditë e më shumë duke u shtuar në mënyrë të frikshme. Por akoma më e frikshme dhe më kriminale është mënyra se si po kërkojnë ta bëjnë duke tentuar që propozimin t’ia faturojnë vet aktorëve të tregut.
Megjithatë përtej arsyeve që ka Ministria e Financave, atyre reale se justifikimet me regjimin automatik janë paçavure që nuk i beson as vet, një gjë është e sigurtë. Një zyrtar publik që shtyn për një masë të tillë është praktikisht armik publik, por rreziku që marrëzia e Ministrisë së Financave të realizohet është shumë i lartë. Kjo është një masë, e cila ka për të ndeshur shumë pak rezistencë politike. Në të shkuarën kjo linjë interesi ja ka dalë të heshtë edhe opozitën. PD e di shumë mirë këtë. Të vetmet zëra kundër me gjasë do të vijnë nga LSI ose deputeti socialist Erjon Braçe. Pjesa tjetër ka për të heshtur teksa qeveria shtyn përpara sulmin e radhës kamikaz. Ndaj barriera e vetme ndaj rritjes së re të taksave mbi naftën, mbetet vetëm reagimi qytetar. Ky është korrupsion dhe duhet ndalur, raporton MCN.
