Turizmi është padyshim një nga sektorët më të prekur nga pandemia, teksa sa më shumë afron sezoni turistik, aq më tepër ndihen pasojat.
Qeveria ka vendosur të hapë plazhet në datë 1 qershor për hotelet dhe në 15 qershor plazhet publike por operatorët turistikë janë në kaos për shkak të vendimmarrjes së paqartë, teksa ende nuk ka një plan konkret se si do veprohet.
Kliton Gërxhani kryetar i Shoqatës së Tur-operatorëve ka deklaruar sot në një intervistë për Abc News se është e pakuptimtë hapja e plazheve, kur ende nuk dihet si do veprohet në fundjava.
Gërxhani shprehet se qeveria duhet të stimulojë turizmin vendas dhe nuk mund të ndalojë qytetarët të shkëputen nga qytetet gjatë së shtunës dhe së dielës.
“ Ka vendime shumë të nxituara që nuk janë marrë nga ekspertët e duhur jemi në pritje dhe në kaos.Askush nuk mund të ndalohet të largohet nga mbyllja mes katër mureve pasi njerëzit po stresohen.Këto duhet të jetë fokusi kryesor dhe ne jemi të pakënaqur nuk është e thënë vetëm plazhet pasi kjo është vetëm një kategori”.
Më tej, ai shprehet se do të duhet të paktën edhe një muaj që të nisë realisht turizmi dhe sa më shumë vonohen protokollet si do veprohet aq më e vështirë bëhet përgatitja.
“Askush nuk mund të planifikojë Shqipërinë për 15-20 ditë .Duhet të dinë kur ne jemi të hapu.Pasi duhet të përgatiten opertatorët duhet të përgatisin paketat”
Një tjetër fakt shqetësues sipas Besnik Vathit, anëtar i shoqatës së turizmit, është se qeveria ka hapur kufijtë dhe plazhet por njëkohësisht vijon edhe karantina.
Sipas tij, është e pakuptimtë që karantina të vazhdojë dhe shqiptarët apo të huaj duhet të rrinë të mbyllur 14 ditë.
“Janë të pasaktë e të paqartë ne duam një datë ekzakte,në datën 1 të hapen kufijtë tokësore me tre kater vende por të saktësohet edhe heqja e karantina se nëse do vazhdojë dhe shqiptarët apo të huaj duhet të rrinë të mbyllur 14 ditë atëherë kjo s’ka kuptim.”
Për Vathin pas tre muaj mbyllje ky sektor është dëmtuar rëndë sepse 70% e turistëve i kanë anuluar prenotimet dhe pjesa tjetër është ende pezull.
Sektori i turizmit vlerësohet shumë i rëndësishëm për ecurinë e ekonomisë shqiptare dhe institucionet ndërkombëtare financiare e lidhin recensionin ekonomik që parashikohet të arrijë nga -5% në -9% gjatë pandemisë pikërisht me varësinë nga sektori i turizmit.
E ndonëse kryeministri Rama ka thënë se turizmi këtë vit do jetë lokal, duhet të kemi parasysh se mijëra shqiptarë janë të papunë dhe në vështirësi ekonomike, duke bërë që pushimet të mbesin në plan të dytë.
Kështu, agjencitë do ulin çmimet për të bërë paketat turistike më të përballueshme, që minimalisht të mbijetojnë, por kjo do jetë minus i madh për ta sepse të ardhurat duhet që të mbulojnë të ardhurat minimale.
Ministria e Turizmit ka deklaruar deri tani se për shkak të situatës, në plazhe duhet të ruhet distanca sociale, çka do të sjellë një numër edhe më të vogël të pushuesve për shkak të ngushtimit të hapësirave.
Shoqata të ndryshme i kanë bërë thirrje qeverisë të shohë më me kujdes këtë sektor, madje i kanë ofruar edhe disa propozime por nuk kanë marrë asnjë përgjigje.
LEXO EDHE : Turizëm kërkojnë, mundësi zhvillimi nuk japin! Sektori turistik në prag falimentimi, ja nevojat urgjente
