Burime nga Kryeministria për “Top Channel”, bëjnë me dije se kreu i shtetit së bashku me një grup të ngushtë, po punojnë në mënyrë intensive për përgatitjen e dialogut me studentët dhe premtojnë se do ketë surpriza.
Rama thotë se është gati për 8 pikat e tyre dhe draftit për uljen e tarifave i mungon vetëm firma e tij për të shkuar në kuvend, por nuk do firmoset asgjë pa nisjen e dialogut.
Burimet konfirmojnë gjithashtu se, pa u hapur dialogu, kryeministri nuk ka ndërmend të lëvizë nga pozicioni i tij.
Pjesë e draftit të këtij grupi pune është edhe vendimi për të shkarkuar anëtarët e qeverisë në bordet e administrimit të universiteteve publike, siç kishte njoftuar Rama, por edhe në këtë rast nuk është hedhur firma. Gjithashtu kjo vlen edhe për drejtorët e konvikteve.
Kryeministri është në pritje të dialogut me studentët sepse pa nisur dialogun ai nuk do bëj asnjë veprim.
Por, bëhet me dije gjithashtu se qeveria tashmë ka një draft gati për ta kaluar menjëherë në zbatim, duke hedhur një hap më tepër përtej asaj që kërkohet nga studentët.
