Porti i Vlorës u dha me koncesion te privatët me tarifën 1 euro për 35 vite. Qeveria e miratoi kontratën në mbledhjen e 13 tetoeit dhe tenderi u fitua nga bashkimi i shoqërive “Marina di Valona” sh.p.k, “Marina Projects” ltd, “Brunes” sh.p.k. dhe “Ndregjoni” sh.p.k.
Me anë të koncesionit, synimi është që Triporti Vlorë të kthehet në një port mallrash dhe peshkimi, ndërsa porti aktual të bëhet një port turistik, njëjtë siç është parashikuar edhe për Durrësin.
“Dhënie e miratimit për lidhjen e kontratës së qirasë, me tarifën 1 (një) euro/kontrata, ndërmjet Ministrisë së Financave dhe Ekonomisë, si qiradhënës, dhe Bashkimit të Shoqërive (JV), “Marina di Valona”, sh.p.k., me, “Brunes”, sh.p.k., me, “Ndregjoni”, sh.p.k., me, dhe “Marina Projects” LTD, me numër regjistrimi 04182366, si qiramarrës, për pronën e paluajtshme shtetërore në zonën kadastrale nr.8602, Bashkia Vlorë, pjesë e fondit të pasurive të paluajtshme për mbështetjen e investimeve strategjike, sipas dokumentacionit të pronësisë, planvendosjes, listës së pasurive dhe tekstit të projekt kontratës, që i bashkëlidhen këtij vendimi”, thuhet në vendimin e qeverisë.
Veç përfitimit të portit falas, kompanitë në fjalë përfitojnë edhe nga statusi i investitorit strategjik, sipas vendimit të Qeverisë. Koncesioni ka formën BOT, që do të thotë se firmat private ndërtojnë, operojnë e më pas bëhet transferimi te shteti.
Oferta e investimit ishte rreth 23 milionë euro. Sipas kërkesave të dhënies me koncesion, porti turistik duhet të sigurojë një vend-ankorim të mbrojtur, të sigurt, funksional gjatë gjithë vitit për flotat moderne të jahteve, duhet të jetë e aksesueshme gjatë gjithë stinëve dhe duhet të sigurojë një kanal hyrjeje të sigurt dhe të lundrueshëm përveç basenit të mbrojtur.
Qëllimi i kontratës është dhënia e përkohshme e objektit në ndërtimin dhe operimin e infrastrukturës “Pro turizmi”, dhe investimi parashikohet 9,811,904,094 (nëntë miliard e tetëqind e njëmbëdhjetë milion e nëntëqind e katër mijë, e nëntëdhjetë e katër) lekë pa TVSH. Minimalisht do të punësohen 100 punonjës.
Për zbatimin e vendimit janë ngarkuar Ministria e Financave dhe Ekonomisë, Agjencia Shqiptare e Zhvillimit të Investimeve, Agjencia Shtetërore e Kadastrës Vlorë dhe Bashkimi i Shoqërive (JV), “Marina di Valona”, sh.p.k., me, “Brunes”, sh.p.k., me, “Ndregjoni”, sh.p.k., me, dhe “Marina Projects” LTD, me numër regjistrimi 04182366.
Kush janë kompanitë fituese të koncesionit:
Brunes sh.p.k
Kapitali – 1.200.000.000 (nje miliard e dyqind milion) leke.
Viti i themelimit- 28.07.2007
Administrator- Geront Çela
Brunes merret me tregtimin me shumicë e pakicë të materialeve të ndërtimit, qeramikë dhe hidrosanitare, hidrotermoizoluese, pllaka për shtrim veshjesh, shitblerje e objekteve të ndërtimit, punime duralumini e punime pllaka gipsi etj. Shitblerje me shumicë e pakicë, eksport import të mallrave të ndryshëm industrial, ushqmor, bar bufe, konfeksione, tekstile, paisje elektroshtëpiake, artikuj mobilerie dhe mobilime zyrash, artikuj kancelarie, karta telefonike. Ekspozimi i mallrave dhe vino teka etj.
Ndregjoni sh.p.k
Administrator- Xhetan Ndregjoni
Kapitali themeltar- 237 146 000,00 lekë
Investitor neëfushën e ndërtimit të objekteve të ndryshme civile dhe industriale, private dhe shtetërore, social kulturore dhe agjenci per shitblerjen e këtyre ndërtimeve. Ndërtimi, rikonstruksioni dhe mirëmbajtja e tyre e punimeve gërmimi ne tokë, ndërtime civile dhe industriale, rikonstruksion dhe mirëmbajtje godinash civile e industriale, veshje fasada, etj, rrugë, autostrada, mbikalime, hekurudha etj.
Marina di Valona sh.p.k
Administrator- Andi Pashaj
Kapitali themeltar- 150 000,00 lekë
Objektivi i kompanisë është aplikimi pranë institucioneve/organeve shtetërore me qëllim marrjen e lejeve/autorizimive/licensave/miratimeve dhe cdo akti tjetër të nevojshëm për ndërtimin apo marrjen në përdorim të infrastrukturave portuale.Ndërtimin dhe/apo administrimin e Porteve të Jahteve, të infrastrukturës mbështetëse turistike të tyre, Hoteleve, Vilave, Apartamente, Restoranteve,Qendra Sportive dhe SPA, pishina dhe cdo aktivitet ose shërbim tjetër turistik në përputhje me projektin arkitektonik dhe inxhinierik që do të ideohet dhe projektohet për këtë qëllim.
