Zv.ministrja e Shëndetësisë dhe kryetarja e Komitetit të Ekspertëve, Mira Rakacolli foli për masat që do të zbatohen për ditën e votimeve.
Rakacolli tha se kjo problematikë është në vëmendje të qeverisë dhe do të merret një vendim së shpejti për të gjithë personat që janë të infektuar.
Në mbledhjen e sotme të zhvilluar të Komitetit Teknik, nuk u vendos asnjë masë e re, por u lanë në fuqi ato ekzistuese me kufizim orari nga 20:00 deri në 06:00 të mëngjesit.
E pyetur nëse këto masa të lehta po mbeten në fuqi për shkak të periudhës së zgjedhjeve, Rakacolli tha se çdo gjë është në kontroll.
“Absolutisht nuk lidhen me zgjedhjet. Ne gjatë gjithë kohës, që në fillim, që prej një viti kemi dëshmuar që kemi mbajtur një qëndrim të arsyeshëm. Kemi parasysh një gjë, që infeksioni i Sars-COV2 dhe i sëmundjes COVID-19 erdhi njëkohësisht në gjithë botën, ishte një ngjarje e re për gjithë botë dhe është një ushtrim që bota po bën në të njëjtën kohë. Të tërë nisemi nga shkenca epidemiologjike, nga masat që shkenca epidemiologjike sugjeron. Komiteti i ekspertëve në vazhdimësi i ka gjykuar masat në lidhje me treguesit. Strategjitë që kanë ndjekur vende të ndryshme janë të ndryshme. Akoma nuk është provuar një strategji që është e mirë për të gjithë. Nga bilancet e deritanishme, Shqipëria me shifrat që ka pasur, masat kanë qenë të arsyeshme. Çdo masë që propozohet, për të ruajtur shëndetin e njerëzve mbi gjithçka tjetër. Shëndeti është prioritet”, deklaroi Rakacolli.
