Kryeministri i Republikës së Kosovës, Albin Kurti, ka shpalosur dje planin qeverisës për vitet 2021-2025.
Ky program ka marrë miratimin e shumicës së ministrave, derisa ka abstenuar ministri për Kthim, Goran Rakiç. Por, çfarë parashihet në Programin e Qeverisë Kurti?
Sipas komunikatës së ZKM’së, Qeveria do ta ketë prioritet menaxhimin e pandemisë së shkaktuar nga COVID-19 dhe lehtësimin e pasojave ekonomike dhe sociale të shkaktuara nga pandemia.
Një prej pikave të programit Qeverisës ka qenë edhe përgatitja e padisë për Serbinë në Gjykatën Ndërkombëtare të Drejtësisë, derisa janë përmendur edhe disa pika të tjera.
“Po paraqes disa prej zotimeve në vijim dhe përmbajtjes kryesore të programit tonë – Do të ndërmarim Vetting në drejtësi e prokurori dhe pozitat e larta në polici dhe inteligjencë. Nuk do të ketë asnjë qytetar në varfëri ekstreme, sepse do të reformojë skemat sociale dhe do të aktivizojmë fuqinë punëtore. Do të rishikojmë skemat e asistencës dhe do të reformojmë sistemin pensional. Do të sigurojmë shtesat për fëmijët, punësim të garantuar sezonal për një anëtar të familjes dhe rimbursim për familjet e varfra”, ka thënë Kurti.
Në program përmendet edhe aplikimi për anëtarësim në Bashkimin Evropian, vettingu në drejtësi prokurori, rishikimi i skemave sociale, rritja e pagës minimale, reformat në administratën publke dhe arsim, si dhe krijimi i Bankës Zhvillimore dhe Fondit Sovran./Gazeta Express
