Ministri i Bujqësisë dhe Zhvillimit Rural, Bledi Çuçi ka nënshkruar me drejtorin i GIZ Hannes Cassens, një marrëveshje ku qeveria Gjermane do të financojë një projekt të ri me vlerë 2 milionë euro.
Projekti ka si qëllim zhvillimin e qëndrueshëm rural në Shqipëri. Kjo marrëveshje synon të adresojë si duhet sfidën e konsolidimit dhe orientimit të bujqësisë në Shqipëri drejt një bujqësie më konkuruese.
Në fjalën e rastit gjatë nënshkrimit të marrëveshjes ministri Çuçi tha se kjo paketë është tërësisht e fokusuar në objektiva realë. Pas implementimit të këtij programit të parë, tha ministri, do të kemi edhe një marrëveshje tjetër me shtesë fondi prej 8 milionë euro.
Shtyllat kryesore ku do të fokusohet bashkëpunimi janë:
- Implementimi i strategjisë dhe politikave për Zhvillim Rural (mbështetje për zhvillimin e strategjive dhe politikave në përputhje me kërkesat e BE-së, duke rritur përthithjen e fondeve të IPARD-it).
- Promovimi i zinxhirit të vlerës së produkteve tipike në zona të caktuara (zgjedhja e produkteve do të ketë orientim ndaj tregut, produkteve tradicionale apo produkteve të turizmit rural)
- Përmirësimi i edukimit dhe forcimi i dijeve në Bujqësi dhe Turizëm Rural.
- Rritja e kapaciteteve dhe njohurive në Bujqësi dhe Zhvillim Rural (mbështetje ndaj shërbimit këshillimor, shoqërisë civile, organizatave etj… me një fokus të veçantë në inovacionin në bujqësi.
