Kuba ka hequr përkohësisht detyrimet e importit për ushqimet, ilaçet dhe gjërat e tjera që janë të domosdoshme pas trazirave të fundit që kaloi vendi. Vendimi hynë në fuqi që nga e hëna e ardhshme dhe nuk do të ketë më asnjë kufizim për mallrat e sipërpërmendura nga udhëtarët deri në fund të vitit.
Sipas BBC, kryeministri i vendit, Manuel Marrero Cruz ka njoftuar ndryshimet ditën e mërkurë në një takim i cili u transmetua në televizionin shtetëror. Ai ka thënë ndër të tjera se kjo ishte një kërkesë e bërë nga shumë persona dhe se ky vendim ishte i nevojshëm të merrej. Gjithashtu ai ka thënë se situata do të analizohet pas 31 dhjetorit.
“Ishte një kërkesë e bërë nga shumë persona dhe ishte e nevojshme të merrej ky vendim. Qeveria “do të vlerësojë gjërat” pas 31 dhjetorit.”-tha ai.
Sjellim në vëmendje se mijëra kuban dolën në rrugë të Dielën në protesta mbi mungesën e ushqimit dhe ilaçeve, rritjen e çmimeve dhe trajtimin e qeverisë të Covid-19. Një kërkesë që ata kishin ishte që njerëzit që mbërrinin në Kubë të sillnin furnizime pa paguar detyrime doganore.
Kuba ka fajësuar Shtetet e Bashkuara të Amerikës dhe sanksionet e saj ekonomike për protestat dhe problemet më të gjera të Kubës. Të mërkurën SHBA-ja bëri thirrje për lirimin e të gjithë protestuesve të arrestuar në Kubë gjatë trazirave të fundit.
