Bastet sportive kanë shpërthyer në internet përmes telefonave nga operatorë ilegalë. Qeveria duke i mbyllur aktivitetet ku punonin me mijëra vetë, nuk bëri gjë tjetër veçse nxiti bastet ilegale dhe lojërat e fatit që zhvillohen në fshehtësi
Me afrimin e fushatës elektorale, qeveria po mendon të lejojë sërish hapjen e këtyre aktiviteteve. Këtë e ka paralajmëruar deputeti Fidel Ylli, i dërguari i kryeministrit Edi Rama të negociojë me Ligën e Futbollit e cila ka bllokuar me grevë kampionatit të kategorisë superiore. |Në një deklaratë për mediat, Ylli la të hapur mundësinë për rikthimin e basteve dhe lotarive sportive.
Ylli, një nga miqtë më të afërt të kryeministrit Rama, ka hedhur një propozim konkret, për rikthimin e basteve sportive.
“Të hapen bastet sportive, janë 50 milionë euro që mund të marrë sporti. Sikur vetëm bastet të merrte sporti nuk do duhej asnjë lek nga buxheti i shtetit. Ishin bërë si kërpudha, po atëherë t’i marrë në dorë shteti, sepse baste ka edhe në Itali dhe në Angli edhe kudo”, ka deklaruar ai.
Qeveria Rama nuk pranon që të marrë barrën e sponsorizimit të sportit, sepse ndodhet në krizë financiare..
“Kemi nevojë për ligj sponsorizimi, sepse do të përfitojë i gjithë sporti. Por sponsorizimi nuk bëhet si duan këta, që donin të bënin një shtet paralel. Federata e Futbollit nuk mund të bëj politikat e gjithë sportit, do prisheshe e gjithë linja e buxhetit”, ka deklaruar Ylli.
Ylli tha se, pas takimit të Ramës me presidentin Duka për shumicën e çështjeve janë në rrugën e zgjidhjes, por gjithçka ka mbetur te ligji për sponsorizimet.
Që nga 1 janar të vitit 2018, qeveria Rama mbylli të gjitha pikat e basteve sportive dhe kazinotë duke lënë hapur vetëm njërën prej tyre, atë tek Tajvani, e cila kishte licencë kombëtare.
/GazetaReforma.com/
