Prej ditësh qeveria ka nisur shembjen e pallateve të para në zonat e dëmtuara nga tërmeti i 26 nëntorit.
Mirëpo, duket se qeveria është shqetësuar vetëm për prishjen e tyre, duke “harruar” inertet në mes të zonave të banuara, që tashmë duken si gërmadha.
Nga ana tjetër, dhjetëra njerëz qëndrojnë çdo ditë mes inerteve në kërkim të telave elektrikë, betonit, hekurit, tullave dhe materialeve të ndërtimit, të cilat më pas i shesin.
Disa javë më parë emisioni investigativ Fiks-Fare denoncoi drejtorin e shkollës 9 vjeçare “Hillari Klinton” në Kamëz, duke treguar se si ai shiste materialet dhe inertetet e dala nga shembja e shkollës.
Ai i dërgonte ato në fusha grumbullimi, por në fakt i shiste kundrejt pagesës.
Deri tani në Shijak kanë mbetur pa u hequr rreth 350 ton mbetje, të cilat janë në mes të qytetit ende pa u lëvizur, teksa të vetmit që po punojnë janë disa njerëz të thjeshtë.
Së fundmi, Dosja.al ka publikuar disa foto që dëshmojnë gjendjen katastrofike që paraqitet në këto zona.
Deri tani është e paqartë se kur do të zhvendosen inertet pasi as as Bashkia, as Ministria përkatëse nuk kanë reaguar.
