Organizata “Qëndresa Qytetare” ka reaguar me shqetësim të madh ndaj një deklarate të bërë nga drejtuesi politik i PS për qarkun Dibër, Blendi Klosi, gjatë një takimi elektoral. Sipas tyre, Klosi ka thënë se vota e parë që ka mbërritur me zarf nga një emigrant në Gjermani është për Partinë Socialiste – një pohim që, sipas organizatës, përbën një kërcënim serioz ndaj diasporës dhe një shkelje flagrante të fshehtësisë së votës.
Në një postim në Facebook, “Qëndresa Qytetare” thekson se nëse kjo deklaratë është e vërtetë, ekziston rreziku që emigranti të ketë qenë i detyruar të fotografojë votën e tij ose ta bëjë atë publike, çka përbën një shkelje të rëndë të ligjit zgjedhor. Organizata ngre shqetësimin se kjo lë të kuptohet se votat e ardhura me postë nga jashtë mund të jenë të kontrolluara ose të ndikuara nga forca politike.
“Blendi Klosi po tenton të përçojë mesazhin se Partia Socialiste e ka mekanizmin për të mësuar se çfarë ka në zarf vota e diasporës dhe kjo përbën një cënim të rëndë të procesit,” thuhet në reagimin e tyre.
Për këtë arsye, “Qëndresa Qytetare” i bën thirrje Komisionit Qendror të Zgjedhjeve që të japë garanci për shqiptarët në emigracion mbi sigurinë dhe fshehtësinë e votës së tyre. Gjithashtu, kërkohet ndërhyrja e menjëhershme e Task Forcës së SPAK për të hetuar deklaratën e Klosit dhe për të përcaktuar nëse ajo përbën shkelje ligjore. Sipas organizatës, nëse pretendimet janë të sakta, Klosi duhet të merret nën hetim.
Postimi i plotë i “Qëndresa Qytetare”:
A po kërcënon Blendi Klosi diasporën se PS i kontrollon votat në zarfe? Task Forca e SPAK duhet të reagojë!
Nga një takim elektoral në Dibër, drejtuesi politik i këtij qarku Blendi Klosi u shpreh se e ka të konfirmuar se vota e parë që ka mbërritur me zarf për një emigrant nga Dibra në Gjermani është për Partinë Socialiste.
Nëse zoti Klosi e ka të konfirmuar, jemi përballë faktit që qytetari ose ka publikuar votën, ose është detyruar të fotografojë votën dhe kjo përbën shkelje të rëndë ligjore.
Blendi Klosi po tenton të përçojë mesazhin se Partia Socialiste e ka mekanizmin për të mësuar se çfarë ka në zarf vota e diasporës dhe kjo përbën një cënim të rëndë të procesit.
KQZ duhet të dalë të sqarojë shqiptarët në mërgim se vota e diasporës është e sigurtë dhe Task Forca duhet t’i kërkojë sqarime Blendi Klosit për këtë deklaratë. Nëse është e vërtetë, ai duhet të merret nën hetim.
