Detaje të reja janë zbardhur nga incidenti i ndodhur paraditen e së premtes në Tiranë, ku një 42-vjeçar shkaktoi panik dhe dëme pas një përplasjeje me policinë.
Ngjarja nisi brenda ambienteve të QSUT-së, ku Enis Vrapi, i dyshuar për probleme të shëndetit mendor, arriti të sigurojë një armë lodër që qëllon me gogla plastike dhe plagosi lehtë në këmbë një infermiere.
Menjëherë ai doli nga godina e spitalit dhe u largua me një automjet tip “Land Rover”.
Kur forcat e policisë tentuan ta ndalonin, Vrapi u përpoq t’i shmanget ndalimit me forcë, duke përplasur tre automjete të shërbimeve të rendit gjatë ndjekjes. Për pasojë, dy efektivë të policisë u plagosën lehtë.
Ngjarja ka ngritur shqetësime për sigurinë në ambientet spitalore dhe për trajtimin e personave me çrregullime të shëndetit mendor, ndërsa hetimet për incidentin janë ende në vijim.
Njoftimi i Policisë:
Rrezikoi jetën e punonjësve të Policisë, pasi përplasi 3 automjetet e tyre, me automjetin që drejtonte, gjatë tentativës për t’u larguar nga ambientet e QSUT, pasi kishte qëlluar me pistoletë lodër, një mjeke, kapet 42-vjeçari.
Sekuestrohet sendi me të cilin qëlloi 42-vjeçari.
Rreth orës 09:00, shtetasi E. V., 42 vjeç, dyshohet me probleme të shëndetit mendor, ka qëlluar me pistoletë lodër (me gogla), në drejtim të gjymtyrëve të poshtme, një mjeke të Qendrës Spitalore Universitare “Nënë Tereza”, dhe ka tentuar të largohet me automjet nga ambientet e kësaj qendre.
Menjëherë pas marrjes dijeni, shërbimet e Policisë i janë vënë në ndjekje këtij shtetasi, kanë mundur ta kapin dhe kanë kryer shoqërimin e tij, në ambientet e Policisë, me qëllim kryerjen e veprimeve të mëtejshme procedurale.
Gjatë tentativës për t’u larguar, 42-vjeçari ka përplasur me automjetin që drejtonte, 3 automjete policie. Nga përplasjet u dëmtuan lehtë 2 punonjës policie të qarkullimit rrugor.
Grupi hetimor, në drejtimin e Prokurorisë së Tiranës, vijon punën për dokumentimin e rrethanave të rastit.
