Një situatë e ngjashme me atë që ndodhi me Lefter Zhidrun pak javë më parë në Elbasan, është regjistruar pasditen e sotme në fshatin ‘Zavalinë’ të Elbasanit.
Raportohet se policia ka shkuar në banesën e një qytetari për të bërë një kontroll, por ky i fundit ka kundërshuar duke qëlluar me armë në drejtim të uniformave blu.
Mësohet se në vendngjarje pas kundërshtimit të shtetasit 45-vjeçar Josif Kavaja, kanë mbërritur edhe forcat e RENEA-s.
Pas incidentit me policinë, i cili ka zgjatur disa minuta, 45-vjeçari ka kërcënuar efektivët se nëse tentojnë të ndërhyjnë, ai do të qëllonte drejt tyre. Incidenti i rëndë ka ndodhur në lagjen Harxov në fshatin Seltë të Njësisë Administrative Zavalinë e Elbasanit.
Bëhet me dije se pas përplasjes me policinë, 45-vjeçari më pas ka mundur të largohet në drejtim te masivit pyjor ku është fshehur.
Policia i ka bërë thirrje të vetëdorëzohet por ai nuk ka pranuar të dorëzohet, ndërsa shfaqej herë pas herë mjaft agresiv dhe i acaruar, sipas dëshmive të efektivëve në vendngjarje.
Kujtojmë se policia zyrtarisht ka konfirmuar se ka rrethuar zonën në një perimetër të gjerë duke marrë masa sigurie për jetën e tyre dhe të banorëve të tjerë në atë zonë.
Në ndihmë të tyre janë edhe forcat speciale RENEA. Paraprakisht konfirmohet se 45-vjeçari vuan nga probleme të shëndetit mendor, që nga koha e kthimit nga emigracioni. Ai prej vitesh jeton i vetëm në fshat, ndërsa të gjithë pjesëtarët e tjerë të familjes janë në qytetin e Elbasanit në shtëpi me qira.
Njoftimi i Policisë:
Elbasan/ Informacion paraprak
Më datë 24.12.2020, forcat e Drejtorisë Vendore të Policisë Elbasan kanë shkuar në fshatin Selte, Elbasan, për kontroll banese, me vendim Gjykate, në banesën e shtetasit J. K., pasi dyshohej se dispononte armë zjarri pa leje.
Në momentin që shërbimet e Policisë kanë arritur në banesën e shtetasit J. K., ky shtetas, në tentativë për t’i shpëtuar Policisë, ka qëlluar me armë zjarri në drejtim të punonjësve të Policisë duke u rrezikuar jetën e punonjësve të policisë.
Nga të shtënat nuk ka punonjës policie të lënduar. Policia Vendore ka rrethuar zonën në një perimetër të gjerë duke marrë masa sigurie për jetën e tyre dhe të qytetarëve të tjerë në atë zonë.
Në ndihmë të Policisë Vendore janë nisur forcat speciale Renea.
Grupi hetimor ndodhet në vendngjarje dhe po punon nën drejtimin e Prokurorisë së Rrethit Gjyqësor Elbasan, për sqarimin e plotë të rrethanave të ngjarjes./Gazetareforma.com/
