Qeveria dhe policia i kanë mbushur “hapsanet” plot me “rebelë” që kanë dalë rrugëve të protestojnë kundër vrasjes së një të riu 25-vjeçar nga Policia e Shtetit.
Nga të dhënat paraprake të Policisë, mësohet se vetëm mbrëmë në Tiranë janë ndalur më shumë se 100 të rinj që janë shoqëruar me dhunë në komisariate pasi morën pjesë në protestën e djeshme.
Disa prej tyre u lanë të lirë pas verifikimeve. Protestat u zhvilluan në disa pika të Tiranës, ku ka pasur përplasje mes policisë dhe qytetarëve.
Ditën e djeshme u zhvillua para Kryeministrisë dhe Ministrisë së Brendshme protesta për vrasjen e 25-vjeçarit Klodian Rasha, që hyri në ditën e tretë.
Edhe dje nuk munguan përplasjet mes protestuesve dhe efektivëve të policisë, që ishin më të shumtë në numër, dhe që nuk nguruan të përdorin gaz lotsjellës dhe ujë me presion, që në minutat e para të protestës.
/GazetaReforma.com/
