Pak kohë më parë, imami Elvis Naçi gjatë kohës që ligjëronte, preket dhe fillon të qajë.
Kjo video është komentuar nga analisti Mustafa Nano, gjatë një monologu në emisionin ‘Provokacija’.
Nano tha se nuk e di se çfarë ka në kokën e Naçit që qan me lot, pasi ka recituar diçka në gjuhën arabe.
Ai e ka quajtur të shtirur reagimin e imamit dhe shton se ka ngelur pa fjalë, kur e ka parë për herë të parë.
“Quhet Elvis Naçi, është imam i një prej xhamive të Shqipërisë. Është duke predikuar një hutbe. Është duke folur për profetët e feve monoteiste, për Ademin, për Ibrahimin, për Musain, për Dautin, për Isain, Muhamedin dhe në fund e mbyll duke cituar një ajet kuranik në gjuhën arabe dhe menjëherë pas kësaj ia kris të qarit. Ia kris të qarit literalisht. Nuk e di se çfarë ndodh në kokën dhe në psiken e atij njeriu në atë moment, por kam ngelu pa fjalë kur e kam parë për herë të parë që ai qan me lot pasi ka recituar diçka në gjuhën arabë të marrë nga Kurani”, thotë Nano.
Gjëja më shqetësuese për Nanon, është fakti se video ka marrë 1 milion shikime në Youtube.
Për analistin, imami shfaqet si imam modern, patriot dhe perëndimor në sytë e besimtarëve, ndërsa thotë se në veshje edhe Ronaldo është më mysliman se Elvis Naçi.
Të qarën e imamit në fund të videos, Nano e quan ekstrem, si dhe e quan Naçin, ‘profet mbi profetët’.
“Asnjë nga profetët nuk e ka bërë këtë. Edhe Muhamedi ka qarë në disa momente, por ka qarë kur ka qenë te varri i nënës. Ndërsa Elvis Naçi është profet mbi profetët, ai qan menjëherë pas një tentative për të komunikuar me Zotin. Çfarë teatri, çfarë estrade për mua! Tani nuk e di nëse e vutë re dhe ligjërimin e përdorur nga imami Elvis Naçi. Ishte një gjuhë e thjeshtë, një gjuhë bazike, elementare ishte si hartimet e klasës së pestë, veçse ai i kishte mësuar përmendësh dhe për mua, më mirë të jesh vuvë se sa të flasësh si Elvis Naçi. Unë po e lë këtu sepse ka rrezik që t’ia kris të qarit. Madje… më duket se më erdhi!”, thotë Nano ndër të tjera.
