Askush nuk i pyet qytetarët shqiptarë kur dalin në rrugë se “çfarë halli kanë?”, për më tepër Policia e Shtetit e cila ka si objektiv vetëm përmbushjen e normës me sa më shumë gjoba ditore nga qytetarët.
Batërdia me gjoba vijon mbi cilin do qytetar që tregohet i pakujdesshëm dhe nuk arrin t’u shpëtojë dot patrullave policore që ngjajnë me ato të patrullave gjermane në filmat e realizmit socialist me temë nga lufta Nacional-Çlirimtare.
Kështu, Policia e Shtetit lajmëron sot se në 24 orët e fundit ka gjobitur 571 qytetarë, pasi nuk kishin vënë maska në publik, ashtu siç parashikohet për rregullat ndaj koronavirusit.
Po ashtu, policia shprehet se janë ndëshkuar gjithashtu 5 qytetarë, pasi nuk kanë zbatuar karantinën e detyrueshme, duke marrë gjobë prej 700 mijë lekësh (të vjetra).
Njoftimi i policisë:
Policia e Shtetit
U konstatuan duke lëvizur pa maskat mbrojtëse, ndëshkohen me masë administrative 3.000 lekë, 571 qytetarë.
Ndëshkohen me nga 700 000 lekë, 5 shtetas që nuk zbatuan vetëkarantinimin e detyrueshëm.
Ndëshkohen me masë administrative edhe 18 shtetas që u konstatuan duke lëvizur në këmbë pas orës 22:00.
Strukturat e Policisë, krahas përmbushjes së detyrave funksionale për parandalimin, evidentimin dhe goditjen e paligjshmërisë, kanë vijuar kontrollet në terren në të gjithë vendin, për të monitoruar zbatimin e masës së re për parandalimin e përhapjes së COVID-19, mbajtjen e detyrueshme të maskës mbrojtëse, e cila është detyrim për të gjithë qytetarët, që në momentin që dalin nga shtëpia.
Si rezultat i këtyre kontrolleve, gjatë 24 orëve të fundit, në të gjithë vendin, Patrullat e Përgjithshme dhe ato të Policisë Rrugore kanë evidentuar dhe ndëshkuar me masën administrative 3.000 lekë secili, 571 qytetarë që janë konstatuar duke lëvizur pa maskat mbrojtëse.
Gjatë kontrolleve janë shoqëruar në ambientet e Policisë në të gjithë vendin, 6 shtetas që nuk kanë pranuar t’i tregojnë punonjësve të Policisë dokumentin e identifikimit, të cilët pasi kanë paraqitur dokumentin e identifikimit, janë ndëshkuar me masën administrative 3.000 lekë dhe më pas janë lënë të lirë.
Në vijim të kontrolleve për zbatimin e vetëkarantinimit të detyrueshëm nga shtetasit e infektuar me COVID-19, janë evidentuar 5 shtetas që kanë shkelur rregullat e vetëkarantinimit, të cilët janë ndëshkuar me masë administrative 700 000 lekë secili.
Gjithashtu, gjatë kontrolleve janë konstatuar 18 qytetarë që lëviznin në rrugë pas orës 22:00, pa arsye të domosdoshme, të cilët janë ndëshkuar me masën administrative 10.000 lekë secili.
Policia e Shtetit, krahas punës për parandalimin, evidentimin dhe goditjen e paligjshmërisë, sigurimin e rendit dhe qetësisë publike, do të vijojnë punën për monitorimin e zbatimit të masave anticovid në të gjithë vendin. Në këtë kuadër i bëhet thirrje të gjithë qytetarëve që të zbatojnë masat anticovid dhe të mos dalin nga banesat e tyre pas orës 22:00 deri në orën 06:00.
/GazetaReforma.com/
