Turizmi është padyshim një nga sektorët më të goditur nga koronavirusi, që pritet të përballet me një krizë të thellë që do shkaktojë shumë probleme.
Kryeministri Edi Rama në një intervistë për News 24 tha se ende nuk ka një përgjigje të saktë se çfarë do të bëhet me turizmin në vend, por sipas tij mund të ketë turizëm të brendshëm, pasi kufijtë mund të mos hapen.
Kreu i qeverisë tha se këtë pyetje e mendon çdo ditë, madje shkëmben informacione edhe me homologët e tij, ndërsa theksoi se kjo është një situatë nga e cila nuk dihet se çfarë vjen pas.
Sipas tij, kjo mund të jetë një gjë e mirë për Shqipërinë pasi shumë të pasur që deri dje mezi prisnin të vizitonin vendet më luksoze, do të qëndrojnë këtu dhe do t’i shpenzojnë këtu paratë e pushimeve.
“Kjo është pyetja më e vështirë, dhe më besoni që është pyetja që unë ja bëj vetes çdo mëngjes. Komunikoj edhe me ministrat e kryeministrat e vendeve të tjera. Me të parë e me të bërë thonë të gjithë. Është një situatë që nuk dihet se si do vijë mbrapa. Ministri i Turizmit po punon me grupin e tij, për të kuptuar se çfarë do ndodhi. Gjëja që duket me e mundshme, gjithmonë nëse do të ketë turizëm, është se ky do të jetë një sezon atipik: turizmi do të jetë i brendshëm. Për Shqipërinë është mirë, se shumë të pasur që mezi presin t’ua hipin jahteve që kanë, që mezi presin të shkojnë në vendet më të shtrenja, do zbulojnë Shqipërinë, bukuritë e vendit, do shpenzojnë një pjesë të parave në vend, do ndihmojë industrinë e turizmit dhe shoqërinë. Ne hyjmë te vendet që ankohemi më shumë se të tjerët që vdesim për bukë, dhe jemi nga ata që harxhojmë më shumë për turizëm jashtë vendit. Kështu që turizmi i brendshëm është më i mundshëm si opsion. Se si do të bëhet nuk e kemi ende të qartë, ndërsa me majin që po afron do të kemi më shumë gjëra të qarta. Ne jemi të kontaktuar nga 2-3 vende në Europë, pasi disa agjenci turistike e shohin Shqipërinë si vend të sigurtë, duke krahasuar se çfarë kemi bërë ne me Covidin.”
Kujtojmë se vendi ynë do vuajë pasoja të dyfishta, pasi jo pak impakt ka shkaktuar edhe tërmeti i 26 nëntorit që tronditi vendin tonë.
Shumë njerëz pyesin nëse do bëjnë pushime këtë vit, e përgjigja për këtë pyetje sigurisht që pritet në radhë të parë të vijë nga ekspertët e mjekësisë.
Por, edhe nëse do lejohet diçka e tillë, që sipas gjasave këtë vit do kalojmë pushime vetëm brenda vendit, ato nuk do jenë të zkonshme, por me rregulla strikte.
