Kremlini ka konfirmuar se Presidenti rus Vladimir Putin ka zhvilluar një bisedë telefonike me Papa Leon XIV, komunikimi i parë zyrtar mes tyre.
Lajmi vjen pak pas njoftimit se Putin ka folur gjithashtu me Presidentin amerikan Donald Trump.
Edhe pse detajet e bisedës nuk janë bërë publike, takimi virtual vjen në një kohë kur Papa i ri ka shprehur në mënyrë të përsëritur shqetësimin e tij për konfliktin në Ukrainë.
Në deklaratat e mëparshme, Papa Leon XIV është shprehur se mendimet e tij shkojnë shpesh te “populli ukrainas i prekur nga sulmet e rënda ndaj civilëve dhe infrastrukturës”.
Ky komunikim mes Vatikanit dhe Kremlinit shihet si një zhvillim diplomatik me rëndësi, mes përshkallëzimit të luftës në Ukrainë dhe përpjekjeve ndërkombëtare për uljen e tensioneve.
