Presidenti rus, Vladimir Putin, ka shpallur një armëpushim të përkohshëm në Ukrainë, i cili do të zgjasë nga mëngjesi i datës 8 maj deri më 11 maj, për të lejuar festimet që shënojnë përfundimin e Luftës së Dytë Botërore.
Kremlini ka njoftuar se ky armëpushim është shpallur për arsye humanitare dhe ka shprehur shpresën që Ukraina do ta respektojë këtë periudhë paqësore.
Rusia ka paralajmëruar se çdo shkelje e armëpushimit do të hasë një “përgjigje adekuate dhe efektive” nga Forcat e Armatosura të Federatës Ruse.
Rusia ka riafirmuar gatishmërinë e saj për të zhvilluar bisedime paqeje pa kushte me Ukrainën, duke theksuar rëndësinë e bashkëpunimit të hapur dhe konstruktiv me partnerët ndërkombëtarë.
Ky armëpushim vjen pas një periudhe 30-orëshe të një armëpushimi të ngjashëm gjatë festave të Pashkëve, ku të dyja palët raportuan një rënie të luftimeve, megjithatë, akuzat për shkelje të ndërsjella vazhduan.
Shtetet e Bashkuara kanë vlerësuar javën që vjen si “thelbësore” për përpjekjet diplomatike të paqes mes Rusisë dhe Ukrainës.
Washingtoni ka bërë të ditur se është duke u përpjekur të ndërmjetësojë një marrëveshje paqeje, duke i dhënë ultimatumin Rusisë dhe Ukrainës për të bërë përparim, përndryshe do të tërhiqet nga ndërmjetësimi.
Nga ana tjetër, Rusia vazhdon të kontrollojë rreth 20% të territorit të Ukrainës, përfshirë gadishullin e Krimesë, të cilin e aneksoi në vitin 2014. Ukraina ende nuk ka dhënë një reagim zyrtar në lidhje me shpalljen e armëpushimit nga Rusia.
