Në vizitën e tij në kryeqytetin serb, presidenti Vladimir Putin tha se Rusia mbështet arritjen e një marrëveshjeje të pranueshme reciproke Prishtinë-Beograd në përputhje me rezolutën 1244.
Putin tha se autoritetet në Prishtinë kanë hedhur disa hapa polemizues së fundi, siç ishte krijimi i Ushtrisë së Kosovës, një shkelje kjo e rezolutës në fjalë sipas tij.
“Rusia ndan të njëjtin shqetësim me udhëheqjen dhe popullin serb se këto veprime të papërgjegjshme mund ta destabilizojnë Ballkanin,”- është shprehur Putin.
Presidenti serb,Aleksandar Vuçiç, duke përsëritur se nuk sheh një zgjidhje të afërt mes Beogradit dhe Prishtinës, tha se për çdo zgjidhje do të konsultohet me Putinin.
“Serbia është gjithmonë e gatshme për negociata dhe kompromis, por nuk pajtohet me poshtërimin,”-ishin fjalët e tij.
Të njëjtin qëndrim, siç tha dhe vetë, ia ka shprehur edhe homologut rus kur kanë biseduar për Kosovën, të cilin e ka informuar për gjithë çfarë ndodh në Kosovë, duke përfshirë edhe tarifën mbi mallrat serbe.
Vuçiç pretendon se ka marrë nga Putini mbështetje të konsiderueshme.
Ndërkohë shefi i Kremlinit drejton vizitën e një delegacion të lartë shtetëror rus në Serbi, ku iu rezervua një pritje madhështore.
Në disa rrugë të kryeqytetit serb, mbërritja e Putinit u prit me shkrimet: “Kosova është Serbi, Krimea është Rusi”.
Kjo ndalesë është parë nga ana e Serbisë, por edhe disa qarqeve ndërkombëtare, si vizitë e rëndësishme politike në një kohë kur ekziston një mundësia në rritje e angazhimit të drejtpërdrejtë të fuqive kryesore në botë për zgjidhjen e çështjes së raporteve ndërmjet Kosovës dhe Serbisë.
