Gazment Bardhi ka dërguar një kërkesë zyrtare SPAK ditën e djeshme në lidhje me hetimet për çështjen “Xibraka”.
Ai kërkon një kopje të vendimit të prokurorit për përfundimin e hetimeve dhe pushimin e procedimit penal ndaj Ols Ramës, pasi hetimet kanë përfunduar me konkluzionin se nuk ka prova që lidhin atë me aktivitet kriminal.
Bardhi kërkon gjithashtu informacion për veprimet hetimore të kryera, provat e mbledhura dhe personat e pyetur, si dhe një kopje të vendimit për pezullimin e hetimeve të procedimit penal nr. 88 të vitit 2024, për t’i dhënë mundësinë për ankimim në Gjykatën e Posaçme.
Në kërkesën e tij, Bardhi thekson disa pyetje për SPAK, duke përfshirë identifikimin e personit të paidentifikuar të moshës 45 vjeç dhe lidhjet e mundshme të Ols Ramës me anëtarët e një organizate kriminale të dënuar për trafik droge.
Ai kërkon gjithashtu informacion nëse prokuroria ka bashkëpunuar me Prokurorinë e Hanoverit dhe nëse është pyetur Ministri i Brendshëm Taulant Balla për çështjen.
Bardhi thekson se përfundimi i hetimeve do të thotë që informacioni dhe provat nuk mbrohen më nga sekreti hetimor dhe kërkon transparencë të plotë për të kontribuar në besimin e qytetarëve tek institucionet e drejtësisë.
Ai shton se mungesa e transparencës dhe mbyllja e dosjeve pa informacion publik rrit perceptimin se drejtësia mbulon individë të fuqishëm politik.
