Punonjësit e Gardës së Republikës bëhen prapë protagonistë të një tjetër akti dhune ndaj gazetarëve në krye të detyrës.
Ngjarja ka ndodhur me një gazetare të televizionit “klan.” Gazetarët dhe kameramanët kanë qënë duke pritur prononcimin e Guvernatorit të Bankës së Shqipërisë, në dalje të Kryesisë së Kuvendit, një gardist ushtroi dhunë fizike ndaj gazetares.
Gardisti ka kapur nga krahu duke e tërhequr me forcë gazetaren, me arsyetimin se po pengonte kalimin e deputetëve.
Por nuk është mjaftuar me kaq. Pas këtij akti, ai ka nisur të ulërasë dhe është dashur reagimi i disa gazetarëve të tjerë që ai të ndërpriste sulmin verbal.
Kujtojmë se kjo është hera e dytë, brenda pak ditëve, që punonjësit e Gardës së Republikës përfshihen në të tilla ngjarje, duke dhunuar gazetarët në detyrë. Pak ditë më parë ka qënë një tjetër gardist që ushtroi dhunë mbi gazetarin e “klan plusit.”
