Banorët e Thirrës në Mirditë kanë dalë sërish në protestë, për të kundërshtuar ndërtimin e një hidrocentrali, pasi sipas tyre do të shkatërrojë burimet ujore dhe ekosistemin e kësaj zone. Këtë të hënë ato ngritën një çadër pikërisht në vendin ku kompania “Lajthiza Invest” ka hapur kantierin për ndërtimin e hidrocentralit. Banorët bënë me dije se do të qëndrojnë “roje” për të mos lejuar vazhdimin e punimeve.
Ata shprehen se kompania prej disa javësh ka punuar në kundërshtim me vendimin e bashkisë Mirditë, e cila ka firmosur pezullimin e punimeve për shkak të disa shkeljeve nga kompania. Banorët shprehen të vendosur në betejën e tyre dhe ju bëjnë thirrje institucioneve shtetërore që të mos bëhen palë me paligjshmërinë.
Por ndërkohë që ligjërisht është pezulluar vendimi, Bashkia nuk ka marrë ndonjë masë për të ndaluar punimet të cilat bëhen ditën për diell nga kompania. Kujtojmë se Bashkia e Mirditës është ndër të paktat bashki e cila drejtohet nga një përfaqësues i opozitës, Albert Mëlyshi. Ndonëse kjo problematikë ka filluar në kohën kur e drejton qytetin PS, Mëlyshi nuk duket se e ‘ka vënë ujin në zjarr’ shumë për këtë problem, i cili i ka ngritur prej vitesh tashmë banorët në protestë dhe po i detyron të bëjnë roje që fadromat mos të punojnë. Mosveprimi ka qenë përgjigja e deri tanishme e kryebashkiakut Mëlyshi dhe institucionit që ai drejton, për këtë shkelje.
Në një intervistë për Citizens Channel, Mëlyshi u shpreh se është në dijeni të ankesave të banorëve të Thirrës se aty po punohet, pavërësisht vendimit të bashkisë për pezullim punimesh. Por, sipas tij bashkia nuk ka mundur të kapë punonjësit në proces pune dhe se është kërkuar bashkëpunim i policisë lokale.
Mirëpo, drejtuesi i Komisariatit të Mirditës ka rrëzuar deklaratat e kryebashkiakut , pasi ‘kjo nuk është kompetencë e policisë, policia është thjesht organ mbështetës’, tha ai për Citizens Channel.
